Jail tángte Advance Krismas hmanpui

Hmeichhia leh naupangte tana hna thawktu tlawmngai pawl, AIKO chuan kum danga an tih ṭhin angin nimin khan Central Jail-a tángte Advance Christmas an hmanpui.

Inkhawm hi AIKO general secretary C Lalchhuanliani'n a kaihruai a; khuallian, Cure Clubfoot Mizoram chairman Zohmingthangi chuan, jail tángte chu sual ngawih ngawiha inngai lo tur leh indah hniam lo tura chahin, "Thil tisual palh theih vek kan ni. Pathian-in a ngaihdam theih loh khawp sual a awm lo. Jail tàn chhung hi hlâwk takin a hman theih a, jail táng ṭmi ropui tak tak an tam a ni," a ti.

Female Ward-a táng mekte'n guitar an mamawh thu an sawi chhangin Zohmingthangi chuan, a rang thei ang bera tihhlawhtlin a nih tur thu a sawi.

Inkhawmah hian DIG Lawmthanga leh Central YMA aiawhin treasurer Lalngheta ten thu an sawi bakah, jail táng kum 70 chung lam mi pariat leh jail táng kantu nei lote hnenah thilpek hlan a ni.

Tun dinhmunah Central Jail-ah hian mipa 546 leh hmeichhia 75 an táng mek a, hmeichhe zinga pathum chu an nute'n loh theih lohna vanga an tànpuite an ni.