Kawng ṭha lo hi vei viau mah ila tun bak hi a ngaihna a awm lo - CM

PWD changtu chief minister Lal Thanhawla chuan, sorkarin kawng ṭha lo vei viau mah se, tun ang bâk chuan tih ngaihna a awm chuang lo niin House a hrilh.

MNF member Dr K Beichhua zawhna kal zelah Chief Minister chuan, a kaihhruai sor-kar chu kawng ṭha duh ber an nih thu sawiin, "Kawng hi kan siam ve reng a, mahse, ruah a sûr rei avangin harsatna kan tâwk. Lirthei rit pui pui hi kan ram leilungin a dâwl loh bakah, lirnghîn duhna rama awm kan ni a, lei chhunga nghing zeuh zeuh renga sawi a ni. Hei bak hi chuan a ngaihna a awm lo," a ti.

Lal Thanhawla chuan, sorkar laipui aṭangin kawng siamna tur hmuh ṭhat a nih loh thu sawiin, sum hmuh loh chuan hna thawh a buaithlak thu House a hrilh.

Dr K Beichhua-a'n kawng chungchangah resolution ṭum hnih an put luh tawh pass a nih loh thu a sawi chung-changah Chief Minister chuan, "Kawng ṭha duhin resolution kan rilruah ni tin kan pass. Resolution pass vang ringawt-in kawng a ṭha thei lo, sumte a ngai a ni. Ruah na tak hnuaiah hna a thawh theih loh," a ti a; inhriatthiam tawn a ngaih thu a sawi.

Chief Minister-in Dr K Beichhua zawhna a chhan danin, Mizoramah national highway km. 1465.120 leh PWD enkawl kawngpui km. 4662.669-a thui a awm. Kawng enkawlna atan hian kum 2016-17 chhung-in state plan aṭangin cheng nuai 3670 leh highway enkawlna atan ordinary repair-ah cheng nuai 696 leh flood damage repair-ah cheng nuai 170 hmuh a ni tawh.