National Highway-54 kawng chhuat tla January 2017 ral hmaa siam zawh tum

PWD changtu chief minister Lal Thanhawla chuan MPC member Lalthanliana zawhna chhangin, Edenthar Veng pêng bula National Highway-54 kawngpui chhuat tla chu January 31, 2017 ral hmaa siam zawh tum a nih thu House a hrilh.

Chief Minister sawi danin, Edenthar Veng bula kawng tlakhniam hun hi fûr lai a nih avangin siamṭhat hna ṭan nghal mai theih a ni lo. Hna thawh theih loh chhungin drawing leh estimate siam a ni a, hna thawhna atan cheng nuai 93 ruahman a ni.

Ruahtui tla a ziaawm hnu October 17, 2016-ah hna thawh ṭan a ni a, Edenthar Veng peng hnaih lamah stone masonry wall metre 12-a sei, metre 9.50-a sang thawh zawh a ni tawh a, bak zawng chu metre 16 chu gabion wall-a siam tur a ni.

Gabion wall siamna atana mamawh wire mesh box 470 chuan November 26, 2016-ah kawng tlakhniamna hmun a thleng a, tunah hian foundation siam rem mek a ni.