Thil dik tâwk lo a awmin sorkarin Mi a hrem zung zung lo - CM Hawla

Chief minister Lal Thanhawla chuan, Mizoram Public Sevice Commission (MPSC)-in staff nurse tura mi 25 a lakte chu an lak dan kalphungah thil fel lo a awm avangin sorkarin a pawm lo tih a sawi a, "Thil dik tâwk lo a awmin sorkarin mi a hrem zung zung ngai lo," a ti.

Nimina Assembly session-a MNF member Lalruatkima zawhna kal zelah Chief Minister chuan, "MPSC-in staff nurse 25 an lakte kha cancel a ni lo, sorkarin a pawm rih lo a ni. Procedure lapse a awm a, lapse a awmin sorkarin mi a hrem zung zung ngai lo," a ti a; thil fel tâwk lo a awm chuan sorkarin uluk taka a zir chian hmasak ṭhin thu a sawi.

MPSC-in staff nurse an lak chungchangah hian Health minister Lal Thanzara chuan, "DPAR duh dan angin en chian a ni a, procedure lapse a awm tih hmuh chhuah a ni. DPAR rawtna angin cancel leh a ni a, lak thar leh turin ruahman mek a ni. Procedure lapse vanga mi hrem a ngaih leh ngaih loh chu DPAR thutlukna tur a ni," a ti.

MPC member Lalthanliana zawhna chhangin Health Minister chuan, tun dinhmunah Aizawl Civil Hospital (ACH)-ah nurse 176 an awm thu a sawi a, "Indian Nursing Council norms angin nurse pakhatin damlo pakua zel an enkawl ang. ICU chu a danglam bik a, nurse pakhatin damlo pathum a enkawl tur a ni," a ti a; ACH-ah hian khum 226 a awm mek thu a sawi.

Lal Thanzara sawi danin, kumin January-October chhungin ACH-ah hian mi 12,713 admit an ni a; chawhrualin, ni tin damlo 51 admit zel ang a ni.

INC member R Vanlalvena leh MNF member Lalrinawma zawhna inang chhangin Health Minister chuan, kum 2016-2017 ah RSBY leh Mizoram State Health Care (MHSC) hnuaiah mi 3,47,718 an inziah luh thu House a hrilh.

Health Minister chuan, RSBY hnuaiah inziak lut mi 1,95,083 an awm thu sawiin, "RSBY hnuaiah hian kum 2016-2017 policy hnuaiah BPL chhungkua 1,37,804 an awm a, hei hi kum 2013-a siam leh 2015-a siam belh lehte a ni," a ti a; Health Care Scheme hnuaiah chuan mi 1,52,635 inziak lut tih a sawi.

Lal Thanzara chuan, tun dinhmunah RSBY scheme hman theihna damdawiin 101 awmin, sorkar damdawi-in 81 leh mimal damdawi-in 20 an awm thu sawiin, "Heng hospital zingah hian cashless facility kalpui theih lohna a awm," a ti.

Health Minister-in damdawi-inte'n cashless facility an kalpui theih loh chhan a sawite chu - kum kal ta lama company aṭanga bill chhuah muan ṭhin vanga sum inbânleh hman loh ṭhin vang te, RSBY rate sang tawk lo tih vanga private hospital ṭhenkhatin RSBY aṭanga bill theih chin bak damlo hnen aṭanga an lo ṭhíng tih hriat chhuah a nih vela hospital-te hrilh nghal a nih vangte leh internet connection ṭhat tawk loh vangte a ni.