Mamawhna zâwn taka sum Hman a pawimawh - Lalsawta

Mizoram Economic Association (MEA) chuan, nimin khan Aijal Club-ah conference an hmang a; khuallian, Finance minister Lalsawta chuan, sum hmuh ang ang mamawhna zâwn taka hman a pawimawh thu a sawi.

MEA conference hi an president Prof. Vanlal­chhawna'n a kaihruai a; Finance Minister chuan, "Mizoramin thawh chhuah ‘state own resource’ kan neih tlem avangin sorkar laipui aṭanga sum hmuh ang ang mamawhna zâwn takah ṭangkaina indawt dan fel taka ngaihtuaha hman thiam a ngai a ni," a ti.

Finance Minister sawi danin, sorkar laipuiin sum pek chhuah dan a tihdang­lam hnuah Mizoram sorkarin a tum ber chu recurring expenditure ngai chi tihtlem te, hmasawnna ruhrel din zawnga sum hman tam te, employment siam tam thei zawnga sorkar kalphung her rem leh kut hnathawk, lo neitu leh entrepreneur-te'n thar chhuah leh thawh chhuah an neihna kawng zawnpuite a ni.