Darkar 24 tui hawtir tum a ni

Urban Development & Poverty Alleviation (UDPA) minister Zodin-tluanga chuan, SIPMIU hnuaiah Aizawl khawpui chhungah ni tin darkar 24 tui a haw theihna turin ruahmanna siam a nih thu House a hrilh.

MNF member Dr K Beichhua zawhna chhangin Zodintluanga chuan, SIPMIU hma-laknain Aizawl khawpui chhungah tui dahkhawlna project-I hnuaiah veng pasarih leh project-II hnuaiah veng pathumah siam a nih tawh thu leh, project-III hnuaiah veng pakuaah siam mek leh siam tum a nih thu a sawi.

UDPA Minister sawi danin, tui dahkhawlna siam project-I hi estimate amount chu cheng nuai 400 a ni a, project-II chu nuai 218 niin, project-III chu nuai 1205 a ni a; contractor chu M/s SS Construction, Chaltlang a ni.

Project-I hnuaia contract hna hi thawh hun tiam chhung thla 18-a thawh zawh a ni lo a, Asian Development Bank remtihna lak a nih hnuah thla kaw dang hun pek belh niin, kum 2010-2012 chhungin thawh zawh a ni.

Project-II pawh hun tiam thla 12 chhunga thawh zawh hman a ni lo a, ADB remtihna lak a nih hnuah thla ruk hun pek belh niin, kum 2012-2014 chhunga zawh a ni. Project-III chu November 2018-a zo hman tura beisei a ni thung.

Hun tiam chhungin hna thawh zawh ni lo mah se, hna an thawh
ṭhat avangin sum an dawn belh tih sawiin UDPA Minister chuan, "He project hi hmarchhak state zawng zawng tana tih a ni. Hna kan thawh
ṭhat vang leh state dangin an thawh zawh theih loh avangin state dang chan ai cheng vbc. 300 chuang Mizoram tan min pe a ni," a ti.