KHAWTHLIR

No Tolerance

Traffic SP chuan thuchhuah siamin, Coordination Committee on Traffic Management-in a rêl angin, traffic dan bawhchhia, a bikin, rûi chunga lirthei khalh, mei zu chung leh mobile phone hmang chunga lirthei khalh leh document fel leh fel lo enfiah rûnpui, ‘No Tolerance Drive/Checking’ an kalpui leh dawn tih a puang a; December 12-ah ṭan a ni ang. Hei hi mipuiin Krismas leh kumthar him tlang taka an hman theihna tura tih a ni.

Thisen pe

Bilkhawthlir Branch KṬP chuan an din champha vawi 62-na pualin December 6, 2016 khan Kolasib District Hospital tan thisen unit unit 30 an pe a, a petute mipa 24 leh hmeichhia paruk an ni. Aizawl Civil Hospital (ACH) leh Association for Voluntary Blood Donation ten ACH Blood Bank-a Christmas Blood Donation an buatsaih mekah Thawhlehni leh Nilaini khan mi eng emaw zatin thisen an pe bawk.

Treasury dawr Theih dawn lo

Mizoram Treasury Accounts Service Association chuan vawiin hian nilengin general assembly an hmang dawn a, hei vang hian Mizoram chhunga Treasury-te dawr theih an ni dawn lo.

Zawn theih loh

Revenue minister R Romawia chuan, MNF member Lalrinawma'n tun dinhmuna Land Revenue & Settlement department record
aṭanga Mizoram chhunga mimal ram nei zau ber leh LSC ngah ber a zawhna chhangin, "Kan record neih dan aṭangin zawn theih a ni lo," a ti.

English seminar

SCERT chuan nimin khan an auditorium-ah English zirna kawnga an hmalakna pakhat atan 'English Language Education...A Way Forward' tih thupuia hmangin national seminar an buatsaih a, School Education secretary P Lalchhuanga'n a hmanpui. Seminar-ah hian NCERT, Mizoram University leh Pachhunga University College-a mithiamte'n paper an buatsaih zirho a ni.