Development a 'chhutri' tawp a ni ber - Zoramthanga

MNF president Zoramthanga chuan, Congress sorkar hnuaiah kawng tinréngah hmasawnna a awm thei lo nia sawiin, "Development a chhutri tawp a ni ber mai," a ti.

Zoramthanga hian December 6, 2016-a Hnahlan community hall-a Champhai North Block-II MNF political training a hmanpuinaah thu sawiin, "Kan kalkawngte hi a chhe lulai lutuk a, chhim lamah phei chuan hman deuha cyclone lo tleh tur anga sawi, tleh leh ta lo pawh kha 'Mizoramah kawng a chhe lutuk a, cyclone pawh a lo kal duh lo a ni,' an ti fiamthu hial a ni," a ti a; Mamit district-ah pawh kawng a chhe lutuk a, maxicab chuan man pawh Rs. 500 bakah tharum a nih thu an sawi ṭhin niin a sawi.

MNF President chuan, Congress sorkarah sum a awm lo a, PWD engineer pakhat pawhin, 'Kan hna hi chu a awlsam lutuk a, kan peon-te pawhin an thawk thei vek ang. Min dawrtute hnena 'Pawisa a awm lo, engmah kan thawk thei lo, lo tih hi kan kan hna chu a ni mai,' tiin a sawi niin a sawi a; "A awm chhun tlemtê lah lal chhungkuain mikhual haw tur chawhmeh pir ang maiin, duhthawh takin an pir a, 'A fím hmasa sa lalnghovi'n a thál zo zel e,' tih ang mai khan party worker leh mipuite'n chan tur an nei lo," a ti.

Congress kaihhruai sorkarin tih tur a hre lo a, sikul luh hun a sawn hma ringawtah leh eng kût emaw phuahchawpa lám mai maiah a puh a, "An tlak tur chianzia chu, an party worker-te an beidawng tawh a, mipuiin an ning tawh a, sorkar hnathawkte'n an kham tawh bawk a, kohhran an tithinur tawh bawk si a, han tla lo zia an ni lo," a ti bawk.

MNF thuchhuah chuan, Hnahlana MNF political training-ah hian chhungkaw 61 aṭangin voter 158 MNF-ah an lawm lut niin a tarlang.