Govt. Complex chin tichiang turin Survey neih a ni dawn - CM Hawla

GAD changtu chief minister Lal Thanhawla chuan, Govt. Complex, Luangmuala sorkarin ram a neih chin tichiang turin survey neih a nih dawn thu a sawi.

MNF member Lalruat-kima zawhna chhangin Chief Minister chuan, "Mizoram sorkar chuan kum 1970/1980 vel khan sorkar office, residential quarters leh
ṭul dang atan Luangmual ramah ram a acquire a, ram neitu hnenah pawh compensation pek a ni. Sorkar quarters tam tak sak a ni a, hengte hi GAD kutah dah niin, a enkawl hna chu PWD kutah a awm thung," a ti.

CM Hawla chuan, Luangmualah hian kum 1997 khan ram eng emaw zat lak belh a nih thu sawiin, "He survey acquire area hi survey mek a ni a, a zau zawng chiah hi hriat theih a la ni lo," a ti a; ram zau zawng chu hectare 114 vel ni tura ngaih a nih thu a sawi.

Luangmuala sorkar-in ram a lak chhunga LSC nei zinga a nupui a tel ve chungchangah Lal Thanhawla chuan, "Khawtlang hruaitute'n Lalrinkima ram an pe a, ani hi ka nupui hian a damlohna thilah a lo enkawl ve ṭhin a, lawmthu sawina atan ram hi a sah ṭhen a ni. Thamna lam ni loin, lawmthu sawina atana inpek a ni," a ti.

Chief Minister sawi danin, Luangmuala sor-kar ramah hian School Education department, Sports department, Presbyterian Church, Salvation Church, MHIP leh mandir sakna atan ram pek a ni a; LSC nei mimal pasarih awmin, house pass nei mi pahnih an awm bawk.

MNF member K Sang-
ṭhuama'n Govt. Complex-a awm mekte chu nawr chhuak loa LSC pek mai a rawt chungchangah CM Hawla chuan, "Tharum hmanga hnawhchhuah chi-ah kan ngai lo. An awmna hmun tlakhniam vanga awmtir, insawn zui ta lote an awm. Tharuma tih chuan sorkar râwng tak tia min sawi tâwk an awm dawn," a ti a; survey neih zawhah an kal zel dan tur chu ngaihtuah a nih tur thu a sawi.