MPCC Communication department leh ZNP ṭhalai hruaitute an inkâwmkhawm

Congress party-a Communication department hruaitute leh ZNP ṭhalaia Information & Publicity hruaitute chu nimin khan B&S Picnic Spot-ah an inkawmkhawm a, zanriah an kîlho.

MPCC Communication department chairman PC Laltlansanga chuam, programme an buatsaih chu an hotute hriatpuinaa tih a nih thu sawiin, "Party lian pahnihte kan indawr ṭan ní a ni ang a, kan indawr zel ang. Pu Lalduhoma'n thlai thar leina kan dah ang a ti a, worker-te'n in aupui mai a. Pu Lal Thanhawla'n NLUP kan sem ang a ti a, worker-te'n kan aupui mai. Pu Zoramthanga'n mau a sawi mawi a, an worker-te'n an sawi mawipui thei lo," a ti a; MNF-in SEDP hmanga Rs. 3,00,000 sem an tum thu an sawi chu a sem theih dan tur an hre lo niin a sawi.

ZNP ṭhalai president Lalmuanpuia Punte chuan, "MPCC Media department-in hetiang programme hlimawm an buatsaih a, ZNP ṭhalaite min sawm hi a lawmawm kan ti hle. Congress hian Pathian malsawmna in dawng nasa a, term nga lai CM nei thei in neih laiin ZNP erawh term khat pawh sorkarna la chang lo, opposition a awm ngaia neih opposition a awm leh zuam zuam em em party kan ni," a ti. "Kan policy phurtu motor hi chirhdiakah a táng tlat a, kan policy phurtu motor min nam chhuahpui theitu apiang chu kum 2018 khi chuan kan thawhpui dawn a ni," a ti bawk.

MPCC Communication department-a secretary Lalhruaitluanga Bawitlung chuan, "Vawiina programme kan buatsaih hi MPCC Media leh ZNP ṭhalaite programme buatsaih ringawt a ni lo a, party pahnih aiawhte'n kan ram kan hnam tana ke pên a ṭulzia lantir ni thei se a duhawm khawp ang," a ti.