ZOFEST hman chhunzawm a ni

Thawhlehnia hman ṭan ZOFEST 2016 chu nimin khan Zokhawtharah chhunzawm a ni a, minister of state C Ngunlianchunga'n hmanpui-in, ZOFEST Souvenir a tlangzarh.

C Ngunlianchunga chuan, ram rorelnain kárah ramri kham mah se, Zo hnahthlak thinlungah erawh ramri kham theih a nih loh thu a sawi a, "Mizoram hi Zofate Jerusalem a nih angin Mizoram páwn aṭanga inpui pantute hi khua leh tuia siam mai hi a ṭha. Hemi kawng-ah zirlaite'n ke an pên chhuah a pawimawh," a ti.

Inlungrualnain hnam ropui a siam thei angin, inpumkhatna leh inunauna ṭhain hnam a tungdingin hmasawnna a thlen ṭhin tih sawiin C Ngunlianchunga chuan, "Inpumkhatna tak tak nei turin Zohnah-thlakte pawm tlàn theih tur hming neih a ṭul," a ti a; hnam bil chawi len tumna leh hmasialnain inpumkhatna a tichhe thei tih a sawi.

Inkhawm hi MZP treasurer Lalnunmawia Pautu-in a kaihruai a, MSU president RB Lalmalsawma'n thu a sawi bakah, hnam hrang hrangte'n an hnam lâmte an entir a ni.