City bus stand pathum sawn

Aizawl City Traffic SP C Lalthanmawia chuan nimin khan hriattirna ti-chhuakin, hmun ṭhenkhata city bus dinna tihdanglam a nih thu a puang. Bus stand tihdang-lam hi mipui remchan zawkna leh him zawkna atana tih a nih thu a tarlang.

Traffic SP-in thupek a chhuah ang chuan, Ramhlun Venglaia Lalbiak-liana Filling Station bula chhim lam pana tlan city bus stand chu a thlanga kawng kual zau lai, RL Building bulah sawn a ni a; Ramhlun North-a Industry Pênga stand chu S Gogoi-a in thlen hma kawng kual zau laiah sawn a ni. Upper Khatla, Sabinga Lung bul kawng kual laia stand chu a piah deuha F Hrangvela in ep, zun-in bulah sawn a ni bawk.

City bus stand zawng zawngah city bus-a lut tur leh chhuak tur dîpdâlin lirthei leh thil dang dah phal a ni lo. Ruahmanna thar hi December 12, 2016 aṭanga hman ṭan tur a ni.