Hmarchhak huap AIDS awareness campaign Mizoramin a thleng dawn

February 6, 2026 khian Mizoram chuan India hmarchhak huapa AIDS Awarness Campaign buatsaih tur a thleng dawn a, a hmingah North East Multi-Media Campaign (Red Fest) tih a ni.

Mizoram State AIDS Control Society (MSACS) project director Dr Jane Rinsangi Ralte chuan nimin khan Aizawl Press Club-ah thuthar thehdarhtute a kâwm a; National AIDS Control Society (NACO) nen ṭang dunin Mizoram (MSACS)-in Red Fest an thlen dawn thu sawiin, "A tum ber chu music nen ṭang kawpa ṭhalaite tana AIDS Awarness Campaign buatsaih a ni," a ti.

Dr Jane R Ralte chuan, February 6 chawhma dar 11 aṭangin LPS Arena-ah hun hman ṭan a nih dawn thu sawiin, "Hmarchhak state tin aṭangin band emaw, soloist emaw an rawn tel dawn a, Mizoram aṭang pawhin zaithiam an zai ang. He huna tel tur hian college hrang hrangte sawm an ni," a ti a, hun hlimawm tak hnuaiah AIDS Awarness Campaign buatsaih tum a nih thu a sawi.

NACO hruaitute leh state tin AIDS Control Society-te pawh an rawn tel dawn thu sawiin MSACS Project Director chuan, "State tinin stall siamin, State AIDS Control Society-te'n HIV chungchang zirtirna hmanraw hrang hrang an pho lang dawn. Tun ṭum hi Red Fest ṭum sarih buatsaih a nihna tur a ni a, Mizoramin a thlen vawi khatna tur a ni," a ti.