KHAWTHLIR

Secy conference

Mizoram chuan February 27, 2026 khian Regional Conference of Cooperation Secretaries of NE States a thleng dawn a, nimin khan Cooperation secretary Udit Prakash Rai hoin sorkar hotute'n conference thlen dan tur an rêl. Conference-ah hian India hmarchhak state pariata Cooperation secretary-te bakah, Ministry of Cooperation-a Secretary, Additional Secretary leh official dangte tel tura beisei an ni.

TB Forum

Lawngtlai District TB Forum chu an chairman Donny Lalruatsanga, bawrhsap hoin nimin khan DC conference hall-ah an ṭhutkhawm. Tarlan danin, January-December 2025 chhung khan Lawngtlai district-ah ngawr (TB) awm lohna khua a awm lo a; TB vei rinhlelh mi 1,037 endik zingah TB vei mi 77 hmuh chhuah a ni. Thla 13 kal chhung khan Lawngtlai district-ah TB vei mi 117 enkawl dam an ni a, mi pahnihin TB an thihpui a ni.

Kuhva phurh khap

Serchhip district bawrhsap Paul L Khuma chuan thupek chhuahin, Serchhip district-ah mah dan loa kuhva lak luh leh phurh phal a nih loh thu a puang. Thupek zâwm lote chu Bharatiya Nyaya Sanhita, 2023 Section 223 hmanga hrem theih an nih thu a tarlang bawk.

Wetlands Day

Nimin kha World Wetlands Day a ni a, thupui chu 'Wetlands and Traditional Knowledge: Celebrating Cultural Heritage' tih a ni. Day hi conservator of forests (Eastern Circle) Lalnunsanga Khawlhring hoin Saitual DC conference hall-ah hman a ni a, Day puala thuziak, lemziak, auhla phuah leh video tawi (reel) insiamsiak lawmman sem a ni.

Drone zone

Aizawl district magistrate Lalhriatpuia chuan thuchhuah siamin, Drone Rules, 2021, Rule 3(1)-in a tarlan angin, drone hman/thlawhtir theihna hmun - green zone, yellow zone leh red zone te thliar a nih thu a tarlang a, "Red zone huam chhungah sorkar laipui aṭanga phalna nei lo tan drone hman/thlawhtir khap tlat a ni," a ti. Zone hrang hrangte chu https://digitateky.dgca.govdn/... ah tarlan a ni a; phalna nei loa phal lohna hmuna drone thlawhtirte chu drone hrênsak a nih dawn thu leh, dan hmanga hrem theih a nih thu a tarlang.