Sports Minister-in lawmpuina a hlân

Sports & Youth Services minister Lalnghinglova Hmar chuan nimin khan a pisaah SAFF Futsal Championship 2026 khelh zawh taka silver medal latu India team-a tel Mizo futsal player paruk lawmpuina hun a buatsaih a; Mizoram Sports Incentive Cash Award sem leh hunah an tel ve theih tur thu a sawi.

Lalnghinglova Hmar chuan, India team-ah Mizo paruk an tel chu a lawm thu sawiin, "International a nih tawh chuan eng thilah pawh a awlsam lo. Mizo player heti zat India team-a kan tel thei leh India team-in silver medal a la thei hian Mizo zingah theihna sang tak a awm tih a tilang a, theihtawp kan chhuah zel a pawimawh," a ti.

India team-a tel Mizo futsal player-te chu hma hruaitu ni zel tura chahin Minister chuan, "A bul ṭantu in ni a, tunah chuan kawng hawngtu in ni tawh a, hma hruaitu in nih zel a pawimawh. MFA Futsal Committee hmalakna leh inpekna a fakawm a, sorkar aṭangin inpuihna tam tak inpek tur a awm lo a, anni'n theihtawp chhuahin hma an la ṭhin," a ti a; Mizoramah futsal inelna mumal tak a awm ṭhin a, thlen chin pawh a san hret hret zel thu a sawi.

South Asian Football Federation (SAFF) Futsal Championship 2026 hi January 14-26, 2026 chhung khan Thailand-ah neih a ni a, a vawi khatna a ni. India team-a tel Mizote chu - Jonathan Lalrawngbawla, Zotlang, Vincent Laltluangzela, Tlangnuam, K Roluahpuia, Tuikhuahtlang leh Electric Veng mi pathum Lalsangkima, H Lalrinzuala leh Lalsawmpuia te an ni.