MLA-in Sampoornata Abhiyan a hawng

India ram puma aspirational district-a neih mek 'Sampoornata Abhiyan 2.0. Programme' chu nimin khan Reiek BDO conference hall-ah Dampa bialtu MLA Dr R Lalthangliana'n a hawng.

Dr R Lalthangliana chuan, Sampoornata Abhiyan chuan mipui leh naupang hriselna lam hawia hmalak leh dinhmun chawikan chu a tum ber pakhat a nih thu a sawi a, "Sorkarin a hmalakna mai piah lamah block hrisel kan nih theihna tur chuan mipui leh NGO-te pawhin mawhphurhna kan nei a, kan tum ve a ngai," a ti.

Mamit district chu aspirational district a nih avangin cheng nuai 1,700 sêngin Mamit District Hospital sak thar a nih thu sawiin R Lalthangliana chuan, "Kan hun lai kum 2023 khan kan hawng hman a ni," a ti a; Mamit district chhungah health sub-centre eng emaw zat health and wellnsess-ah an hlangkai a, health clinic eng emaw zat dinin, kawng hrang hrangin hma an lak thu a sawi.

Dampa Bialtu MLA chuan, Mamit district chu khai chhuah ngai an nihna an hman thiam chuan awmze nei taka an kal theih dawn thu sawiin, "Sorkar department, NGO leh VC-te pawhin lo hria u la, eng ber hi nge kan mamawh tih ngaihtuahho zel ila, theihtawpa hmalak dan kan dapho zel tur a ni," a ti.

RD Block hotute chu sorkar hriatpuina nen hneh taka an bial vil tur chahin Dr R Lalthangliana chuan, "Hun tiam chhunga hmasawnna hmuh hman tum tur a ni," a ti a; aspirational district an nihna anga Mizoramah hmasawn chak ber district ni tura theihtawp chhuahpuiah a sawm a ni.