Digital service lamah India rama hmahruaitu nih kan duh - CM Duha

4th February, 2026

Cooperative Societies Registrar pisa computerisation thar chu nimin khan chief minister Lalduhoma'n a pisaah a hawng a; digital service lamah India rama hmahruaitu nih an duh a, nasa taka hma an lak thu a sawi.

Chief Minister chuan, mipui tana sorkar dàwr dan awlsam leh rang an ngaihlu a, an sorkar kum 2 chhungin nasa taka hma an lak thu a sawi a, "Digital service lama India rama hmahruaitu nih kan duh. Kan state a zím a, mipui kan tlem a, ziak leh chhiar thiam vekna state kan ni. Sap ṭawng hria kan tam a, digital service lama a ṭha ber nih theihna remchang kan neiah kan ngai a, hma kan la nasa a, kum hnih chhungin online service portal 20 aia tam kan siam tawhin a rinawm," a ti.

Tun hnai lawkah Mizoram CSR Connect portal hawn a nih thu sawiin Lalduhoma chuan, "Cooperative Societies Registrar office computerisation hian khaw hrang hranga society-te tan awlsamna tam tak a thlen dawn a, thawktute tan pawh awlsamna a pe dawn a ni," a ti a; hun rei lo te chhunga hawn theiha peih a nih avangin a lawm thu a sawi.

Cooperation minister PC Vanlal-ruata pawhin thu sawiin, Cooperative Societies Registrar pisa computerisation tura hmalaknaah India rama a zo hmasa ber dawttu an nih thu a sawi a, "Mizorama a puma office computerise hmasa ber kan nih kan inring. Chief Minister-in kan beisei anga min hawnsak hi kan lawm hle a ni," a ti.

Cooperation secretary Adit Prakash Rai sawi danin, computer-isation project hi Mizoramah March 29, 2025 khan ṭan a ni a, Registrar pisa chauh ni loin, district hrang hranga cooperative pisate a huam. Cloud infrastructure atan INEXT Systems, Zarkawt thlan a ni a, software development chu National Informatics Centre Services Incorporated (NICSI) kaltlangin Velocis Systems (CMMI Dev 2.0 Maturity Level 5), Noida-in an siam a ni.

Project-in a tum ber chu - cooperative society-te tana an hna thawhnaa samkhaina siam leh cooperative society-te'n a hmuna kal kher ngai loa digital-a Registrar pisa leh district hrang hranga pisa-te an dawr theihna a ni.