Leilung leh a chhunga awmte humhalh leh hmasawnna hnathawh zirho a ni

Pachhunga University College-a Department of Environmental Science leh Society for AgroEnvi-ronmental Sustainability, Dehradun, Uttarakhand te chuan nimin khan PUC Auditorium-ah ‘Interna-tional Conference on Recent Advances in Environ-mental Research, Biodiver-sity Conservation and Sustainable Development” an buatsaih ṭan a, minister Vanlalhlana leh Dr Van-lalthlana ten an hmanpui.

Khuallian Vanlalhlana chuan, ramngaw leh nungcha tihchereu nasat vang leh sik leh sa inthlak danglam nasa vanga harsatna hrang hrangte chuan khawvel a nghawng a ni mai lo a, khawtlang nun, eizawnna leh ṭhangthar awm zel turte tan nghawng ṭha lo a nei thei tih sawiin, "Ram hmasawnna hna thawh leh environment humhalhte hi inkhuangrual taka fimkhur taka kalpui a ngai," a ti.

Ram hmasawnna hna thawk tak tak turin kawng laih leh hmasawnna ruhrel hrang hrang din a ngaih thu sawiin, "Ramngaw, thing leh mau ten an tawrh chang a awm ṭhin," a ti a; inkhuangrual taka hmasawnna leh environmental humhalh a kal theih nan zirhona chu a ṭangkai a beisei thu a sawi.

Khualzahawm Dr Vanlalthlana chuan, chhuan la awm zel turte tana chenna tlak ram nuam leh hrisel nei turin uar lehzuala zirbingna kalpui a ngaih thu a sawi a; environment humhalhnaa sorkar hmalakna dan te, Mizoramah zirna kalphung ṭha lehzual a awm theih nan hmalak mek a nih thute a sawi bawk.

Zirhona hawn inkhawm hi PUC Department of Environmental Science HoD Dr Kulendra Chandra Das-aṭ'n a kaihruai a, PUC principal Prof. H Lalthanzara leh Department of Environmental Science assistant professor Dr Hilda Lalrinpuii te pawhin thu an sawi. Conference hi online leh offline-a kalpui a ni.