Knowledge Exchange Health Conclave: 'Mipui hrisel nan nasa takin hma kan la' - CM

Mizoram Health Systems Strengthening Project (MHSSP) chuan nimin khan Folkland Park-ah Knowledge Exchange Health Conclave an buatsaih ṭan a, chief minister Lalduhoma'n a hawng. CM chuan, Mizoram mipui hriselna atan sorkarin nasa taka hma a lak thu a sawi.

Chief Minister chuan, "Mizoram sorkar hian mipuite hriselna hi ram hmasawnna zelna atana thil pawimawh tih a hriat avangin mipuite hriselna lamah nasa takin hma a la a, India rama healthcare system ṭha ber pawl Mizoram Universal Health Care Scheme a duang chhuak a, empanelled hos-pital kaltlangin cashless-in damlote enkawl an ni," a ti.

Mizorama hriselna lam hmunhmate nasa taka thuam ṭhat a nih thu sawiin Lalduhoma chuan, "Thawktute tan khawl changkang tak tak kan lei a, hriselna lamah hmasawnna thar kan thawk nasa hle. Hmalakna tam tak hi MHSSP kaltlanga kan thawh te a ni," a ti a; hriselna lama hma an lak theihna bul chu sorkar laipui leh World Bank an nih thu a sawi.

CM Lalduhoma chuan, Conclave-ah state hrang hranga mithiamte'n thu an sawi dawn tih sawiin, "Conclave zarah hmalakna tur ṭha zawk leh hriatna zau zawk kan neih kan beisei a, India ram tana kan thawhhonaah te, hma thar kan lak zelna atante a ṭangkai dawn," a ti a; hlâwk taka hun hman tum turin Conclave-a telte a chah. Chief Minister hian coffee table book a tlangzarh a ni.

Health minister Lalrinpuii pawhin thu sawiin, MHSSP kaltlangin damdawi-in leh centre-te thuam ṭhat a nih thu leh khawl thar tam tak lei a nih thu a sawi a, "Khawl kan leite ṭangkai taka kan hman avangin India rama quality certificate dawng thei pawh kan neih phah nual a ni," a ti.

MHSSP project director Dr Lily Chhakchhuak sawi danin, MHSSP hi World Bank sum hmangin kum 2021-ah kalpui ṭan a ni a, kum nga chhung kalpui tur a nih angin March 2026-ah a tawp dawn.

MHSSP-ah hian Mizoram tan cheng vbc 280 dah a ni a, January 2026 khan project develop­ment objective panga zinga pali tihlawhtlin a ni. Intermediate result indicator target 16 zinga 14 hlen a ni tawh a, la hlen lohte chu March 2026 ral hmaa tihhlawhtlin vek beisei a ni. MUHCS hnuaia enrolment target 91% tihhlawhtlin a ni bawk.

Knowledge Exchange Health Conclave hi vawiinah chhunzawma zawh a ni dawn a; Telanagana, Megha-laya, Nagaland, West bengal, Assam, Tamil Nadu, Gujarat, Sikkim leh Aruna-chal Pradesh aiawh mithiamte bakah, Gates Founda-tion leh North Eastern Council aiawhte an tel a ni.