KHAWTHLIR

HBC-in thisen pe

Hrangbana College NSS chuan nimin khan an college-ah thisen pe an huaihawt a, Civil Hospital Aizawl tan thisen unit 79 an pe a, petute mipa 64 leh hmeichhia 15 an ni.

Kawng khâr dawn

Traffic SP C Vanlalvena chuan hriattirna chhuahin, Lower Kanan kawngah tuichhe paihna pipe phûm a nih dawn avangin Joint YMA Field aṭanga Kanan Veng Presbyterian biak-in inkar kawng chu vawiin aṭanga hna thawh zawh hma chu zan dar 9 aṭanga zing dar 5 inkarah khâr a nih dawn thu a tarlang. Bazar Bungkawn thlanga Modern School kual pêngṭhuam siam a nih dawn avangin vawiin aṭanga hna thawh chhung zawng zan dar 9 aṭanga zing dar 5 inkarah kawng khâr a nih dawn thu a tarlang bawk.

SCC viltute training

Lawngtlai bawrhsap Donny Lalruatsanga, District Agriculture Marketing Committee chairman ni bawk kaihhruaiin nimin khan DC conference hall-ah secondary collection centre-a supervisor leh assistant supervisor-te tan training buatsaih a ni. Mithiamte'n 'SOP for Secondary Collection Centres & Primary Collection Centre' leh 'Book Keeping, Accounting & Portal Entry' chungchang an zirtir.

India Study Tour

National Defence College, New Delhi-a officer 17-te chuan 66th National Defence College course for Understanding India Study Tour an nei mek a, nimin khan Serchhip district-a hmun hrang hrang an tlawh. Officer-te hi district bawrhsap Paul L Khuma hoin DC Pisapui Hall-ah Serchhip district-a sorkar hotute leh tlawmngai pawl hruaitute nen an inkâwm bawk. Officer-te hi India ram state hrang hranga mite bakah Germany, Maldivies, Morocco, Russia leh Nepal aṭangtea rawn kal an ni.

Vibrant Village-II

Mamit District Level Committee on Vibrant Village Programme-II chu nimin khan district bawrhsap K Laltlawmlova hoin an ṭhukhawm a, hmalak dan tur an rel. Vibrant Village Programme-II hi Mamit district-a West Phaileng RD block chhunga khaw pali - Bega Bekya (Lianbuang), Hnahva, Silsury West leh Silsury East leh, Kawrtethawveng RD Block-a Tuipuibari, Rajivnagar-I leh II-ahte kalpui a ni dawn.

Thing man

Kawrthah Forest Division chuan tun hnai khan dan lo leh phalna nei loa thing kih phurtu truck pakhat leh a chhunga thing tum (round logs) tam tham tak an man. He thil phêna a bul tumtu zawn mek a nih thu sorkar thuchhuahin a tarlang.