Assembly session a tiak ta

Ni thum awh Mizoram Assembly session chu nimin khan a ṭiak ta. Session tawp ní hian House member-te an inhnial buai deuh a, deputy speaker R Lalrinawma chuan a thu zâwm lo chu House-ah an ṭhut theih loh thu a sawi hnuah inhnial buai thâwm a reh.

MNF member Lalruatkima'n MIZOFED-in buhfai an supply dan chungchang a zawhna kal zelah zawhna dang awmte chu Cooperation minister Lalrinmawia Ralte chuan a department chan páwn lam thil a awma a hriat avangin Food Civil Supply & Consumer Affairs (FCSCA) Minister chhantir mai turin rawtna a siam a; Deputy Speaker chuan FCSCA minister John Rotluangliana chu zawhnate chháng turin a ko a ni.

FCSCA minister John Rotluangliana'n zawhnate a chhan dawn hian zawhna neitu Lalruatkima chuan, Cooperation Minister chhan tur a nih thu sawi mah se, FCSCA Minister chuan zawhnate hi a chhang zui.

Lalruatkima'n buhfai supply danah thil fel tawk lo a awm thu sawiin, "Supply order-ah buhfai quintal khat Rs. 2,450-a supply tura a inziah laiin, bill-ah chuan Rs. 2,480 angin a inziak. Supply order aia bill a tam zawk chhan hi eng nge, buhfai grade-I hi chi hnih a awm em ni? Chu bakah buhfai supply-te hi a chhe lutuk, ei tlak a ni lo," a ti a; Lungbiala ration buhfai an sem chu House-ah a lek chhuak.

Cooperation Minister chuan, buhfai supply a chhiat thu hi a thuphung chuan a dawn ve thu sawiin, "Buhfai supply a chhiat chungchang hi rang takin kan inhrilh hria a ni. Chu bakah, buhfai supply apiang kudamah endik a ni a, a chhia eng emaw zat chu supplier-te lak lêttír an ni," a ti.

Hetih lai hian, FCSCA Minister chuan, MIZOFED-in September 2016 thleng bak buhfai an supply loh avangin, buhfai ṭha loa sawite chu MIZOFED supply a nih loh thu a sawi a; buhfai supply-naah eirukna pakhatmah a awm loh niin House a hrilh.

House member-te an inhnial buai deuh avangin, Deputy Speaker chuan House chhungah chuan a thu ber a nih angin, member-te leh mipuite'n an hriat fiah zawk theihna atan FCSCA Minister chu zawhna chhang tura a koh thu a sawi a; a thu zâwm turin member-te a hriattir.

Hetih lai hian, MNF member K Sang-ṭhuama chuan, Deputy Speaker chu a rorelnaah lái ve deuh se a duh thu a sawi a; Deputy Speaker erawh chuan a thu zâwm lo chu House-ah an awm theih loh tur thu a sawi thung.

Assembly session neih zawh takah hian dan ding lai siamṭhatna bill pakhat 'The Mizoram Fisheries (Amendment) Bill, 2016' leh dan thar 'The Mizoram Drug (Controlled Substances) Bill, 2016' pass a ni a, paper panga pharh a ni.