CM-in zawhna a chhan duh loh vangin MNF-te'n Assembly House an pan

Assembly session-ah chief minister Lal Thanhawla'n MNF MLA Lalruatkima zawhna a chhan duh loh vanga lungawi loin MNF party mi eng emaw zat chuan MNF ṭhalai huaihawtin nimin chawhma khan Mizo Hnam Rûn aṭangin Assembly House an pan a; Assembly House bulah police-te'n lo dangin, nasa takin an innawr.

MNF kalkhawmte chuan resolution an pass a; Assembly session ṭan ni, December 6, 2016-a Aizawl West-II bialtu MLA Lalruatkima'n Sihhmui-Lengpui kawng NH-44A a Tlawng lei vawi thum lai chim tawh June 24, 2016-a dawh zawh a nih chungchang a zawhnaa zawh belhna PWD changtu CM Lal Thanhawla'n a chhang duh lo chu an dem thu an tarlang.

MNYF chuan, Assembly session-a zawh belhnate chu mipui hriat atan a ṭangkai tih sawiin, "PWD changtu CM Lal Thanhawla'n a chháng duh lo a, 'Ka chháng dawn lo,' tiin a sawi a ni. Hetianga CM-in mipui aiawh, MLA zawhna a chháng duh lo hi engti zawng mahin kan hrethiam thei lo. Mizoram mipui hmaah ngaihdam dil tur leh sawifiahna siam ngei turin Chief Minister hi kan phût. Assembly House zahawmna a tibawrhbáng a, a thlang tlingtu mipui a zah lo a, ram leh hnam a timualpho. A ṭul ang zela hmalak zui kan tum a ni," an ti.

MNF resolution chuan, Mizo-ram hmun hrang hranga kawngpui ṭha lote siam turin vawi tam tak sorkar an ngen tawh nia sawiin, "Kawng siam thei loa an insawina pawh kum riat zet a tling tawh. Tun hi hna thawh theih lai, working season’ a ni a, kawng siam tura hmalakna pakhat a la awm chuang lo," a ti a; sorkar chu mipui tana ding zo loah puhin báng turin an phût.

Resolution chuan, sorkar chu MIZOFED kaltlanga an mi duhsak zawngte buhfai supply tírah an puh a; "Buhfai chhia supply tirtu leh eirawngbawlna gas harsa lutuk ngaihthahtu minister John Rotluangliana hian a hna a la tlin lo zar zar a, a bàn ngei kan phût," tiin a tarlang.

Sorkarin zu zawrh a phal avangin mi tam takin nunna an chàn phah nia sawiin, sorkar chu sum aiin nunna a hlu zawk tih hriain zu zawrh bànsan turin an phût a; "Sorkarin sum deh a thiam lo a, corruption a hluar a, development a ṭhanṭhu a. Chutih laiin chhiah nasa taka tipungin mipui min hrêk bet a. Congress sorkar hi báng turin kan phût a ni," an ti bawk.

Nimina MNF-te'n Assembly House an pan hi Assembly House bulah police-te'n an lo dang a; nasa takin an innawr a ni.