K-Deposit-ah cheng vbc. 335.14 dah

Finance minister Lalsawta chuan, MNF member Dr K Beichhua leh Lalruatkima zawhna inṭáwm ziaka chhangin, November 30, 2016 thleng khan Mizoram sorkarin K-Deposit-ah sum cheng vbc. 335.14 a dah thu a tarlang.

Lalsawta chuan, K-Deposit-a sum dah chhan chu chi hnih a awm theih thu tarlangin, "A pakhatnaah chuan budgetary allocation siam tawh, hna thawhna bill hrang hrangte hi RBI-a kan cash balance-in a daih ṭhih loh avangin dah a ni. A bik takin 14th. Finance Commission recommendation kan hman hma, kan budget-a lak luh theih tura kan tarlan, a taka kan hmuh theih si loh a awm ṭhin hun lai khan K-Deposit-ah sum kan dah tam deuh ṭhin," a ti.

14th Finance Commission hman chinah chuan K-Deposit-ah sum dah belh a tam lo a, zawi zawia a tlakhniam zawk thu sawiin Finance Minister chuan, "Department hrang hrangte'n hna an thawh loh emaw, tlem chauh thawh emawahte pawisa a hlawma pek chhuah vak hi GFR-in rem a tih loh bakah, risk a tam avangin sum ṭhahnem tak K-Deposit-ah dah a ni ṭhin," a ti a; a bik takin CSS sum-te financial year tawp dawna dawn a nihin hun rei lote atan K-Deposit-ah dah a nih ṭhin thu a tarlang.

Finance Minister tarlan danin, Mizoram sorkar chuan Committee on K-Deposit chuan K-Deposit tihtlem emaw, pumpelh dan tur emaw rawtna a siamte ṭha taka zawm a ni a; chuvang chuan nasa taka hma sawnin, tun dinhmunah chuan K-Deposit-a sum awm a tlahniam tawh hle a ni.

K-Deposit-a sum dah dan

Department Dah zat

(Rs. in crore)

AH & Vety 38.41

Horticulture 11.35

Agriculture 34.51

Sports & Youth 0.75

Police (AIGP-I) 4.04

FCSCA 15.45

Election 0.16

UDPA 29.92

Health Services 15.36

Art & Culture 6.98

Soil & WC 20.77

School Education 6.42

Minor Irrigation 1.93

Environment & Forest 1.22

PWD 146.51

Power & Electricity 1.36