Dan thar hnuaiah mi 129-in Stamp duty an pe hman

Land Revenue & Settlement (LRS) minister R Romawia chuan, September 1, 2016 aṭanga The Indian Stamp (Mizoram Ammendment) Act, 2016 hman ṭan a nih hnuah mi 129-in stamp duty an pek hman thu a sawi a; dan thar hnuaia stamp duty pete chungchang chu ngaihtuah a nih tur thu House a hrilh.

MNF member Dr K Beichhua zawhna chhangin R Romawia chuan, The Indian Stamp (Mizoram Ammendment) Act, 2016 suspend turin dan tlawhchhan neih kher a ngai lo tih a sawi a, "He dan hnuaiah hian ram hlut zawng chhûttu tur Valuation Committee siam tur a ni a, Valuation Committee-in dinin, anni hian rate an siam hman ringin dan hi hman a ni. Mahse, din lawk theih a ni lo a, chuvangin uluk taka ngaihtuah a nih hnuah dan hi suspend hrih a ni," a ti.

LRS Minister chuan, stamp duty hnuaia pawisate chu an department-in pakhatmah an dawn loh thu sawiin, "Dan thar hnuaia pawisa lo pe tawhte hi pek let an nih dawn pawhin department hrang hrang leh vendor-te nen sawiho tur a ni. Pheikhawk Rs. 1,500 a lei a, Krismas discount vanga Rs. 1,000-a an zawrh vanga thleng leh tum ang deuh a ni," a ti a; dan thar hnuaia pawisa pekte chu pek let leh chi niin lang lo mah se, sawiho tho a nih tur thu a sawi.

R Romawia tarlan danin, stamp duty aṭang hian kum 2013-14 ah Rs. 7,17,885; kum 2014-15 ah Rs. 31,98,037 leh kum 2015-16 ah Rs. 33,96,593 hmuh a ni.