MPTA-in Womens Network Seminar buatsaih

Mizoram Primary Teachers Association (MPTA) chuan, nimin khan Dawrpui School-ah Womens Network Seminar an buatsaih a, Mizoram State Commission for Women chairperson Vanlalawmpui-i Chawngthu, MLA-in a hmanpui.

Vanlalawmpuii Chawngthu chuan, zirtirtute chu hnam rohlu an nih thu sawiin, "Zirlaite lehkha thiamtir mai piah lamah, an nun kawng zirtirtu in ni a, nu leh pate tih lohah chuan kan lei Pathian hmuh theih in ni a, in pawimawh tak zet a ni," a ti.

Vanlalawmpuii chuan, "Ram roreltuah Pathian leh mipuite zarah kan awm ve a. Chuta ṭanga ka hmuhchhuah chu, zirtirtute, a bikin thingtlanga thawkte hian Aizawla an thawh duh avangin hrisel lohna leh harsatna dang an chhuanlam nasa em em. Hei hi a veiawm a, thingtlang naupangte'n khawpui mite ang thoin zirtirtu ṭha an mamawh ve si avangin kan hnathawhna hi Pathian rawngbawlna a ni tih kan hriat nawn fo a ṭul," a ti a; hotute'n an dahna hmun apiangah rinawm leh taima tak leh lungawi taka thawk zel turin zirtirtute a chah.

Seminar-ah hian primary school zirtirtu ṭhahnem tak an tel a; resource person Mitra Dutta, All Meghalaya Primary School Teachers Association senior vice president-in zirtirtu hmeichhiate mawhphurhna leh tih tur hrang hrang a sawi a ni.