Hindi zirtirtute'n hlawh an la lo rei

School Education minister H Rohluna chuan MNF member Dr K Beichhua leh Lalruatkimate zawhna inṭawm chhangin, Mizorama CSS hnuaia Hindi zirtirtute'n March 2016 aṭangin hlawh an la lâk theih loh thu House a hrilh.

H Rohluna chuan, Mizoramah CSS Hindi teacher 1,297 awm anga ngaih ni mah se, thihna vang te, thawh ṭhat loh vanga bàn an awm vangte leh mahnia bángte an awm thu a sawi a, "Heng CSS Hindi teacher-te hi ni 18.2.2011 aṭanga thawk ṭan an ni a, February 2017-a tàwp tur an ni," a ti.

Hindi zirtirtute hian March 2016 aṭanga hlawh an lak tawh loh thu sawiin Rohluna chuan, "An hlawh hi sorkar laipui tum vek a ni. Tunah hian thla hnih hlawh tling lo deuh sorkar laipui aṭanga dawn a ni a, sem theih thuai beisei a ni," a ti a; sorkar laipuiin sum a pek chhuah loh chuan state tan tih ngaihna a awm lo tih a sawi.

School Education Minister chuan, sorkar laipui aṭanga pawisa an dawn a nih chhung chuan Hindi zirtirtute chu chhawr an nih tur thu a sawi a, "State-in a lak tur chuan tun dinhmun-ah chuan kan sum din-hmunin a tlin lo. An thawh chhunzawm zel theihna atan leh ṭha taka hlawh an lak theihna atan theih-tawp chhuah a ni," a ti.

MNF member Lalrinawma zawhna chhangin H Rohluna chuan, kum 2016-17 chhungin sikul naupang hnenah free textbook 1,19,094 sem a nih thu a tarlang bawk.