Battle Honour of Chhamb champha lawm

5th. Assam Regiment aṭanga pension chhuak intêlkhawm, Ex-Fighting 5th Association (EFFA) chuan nimin khan Aijal Club-ah an regiment-in Battle Honour of Chhamb an hmuh champha an lawm a, Home minister R Lalzirliana'n a hmanpui.

Home Minister chuan, Chhamb indonaa huai-sen taka ram tana beitute chhuan-awm a tih thu sawiin, "Ram innghahna tak tak chu sipaite hi an ni lo thei lo. Sorkar pawhin sipai báng leh ṭang mekte a ngaihsak a, an chhungte thlengin a ṭul anga ruahmanna a siam ṭhin. Mizo ṭhalaite zingah sipaia lut an tam zawk theih nan sorkar pawhin hma a la a ni," a ti.

Sipai hna chu ram tana inpekna a nih avangin a chhuanawm mai piah lamah, mahni inthununna ṭha tak nen inkaihruai an nih avangin an hriselna pawh a ṭha tih sawiin R Lalzirliana chuan, "Sipai báng tawhte aṭangin zir tur tam tak kan nei a ni," a ti a; sipai bángte chhiatni ṭhatnia an inngai pawimawh leh an inṭawiawm ṭhin dan te, veng chhunga mi ṭha leh hmantlak tak an nih zel ṭhin chu fakawm a tih thu a sawi.

Home Minister chuan, Krismas leh kumthar vuakvêta hâlpuah leh a kaihhnawihte leh silai lem, a mu nei khap a nih chhan sawiin, "Halpuahte hi hriselna kawngah nasa taka a ṭha lo zawnga nghawng nei thei a nih avangin khapna thu hi mipuiin an thlawp ka beisei," a ti a; sorkarin a khap thilte hi checkgate-ahte pawh enfiah a nih tur thu a sawi.

Inkhawmah hian par-liamentary secretary Hmingdailova Khiangte leh Sainik Welfare & Resettlement director Surg.Lt.Cdr. Lalnuntluanga te pawhin thu an sawi.

Ex-Fighting 5th. Association (EFFA)-ah hian sipai bángte bakah, indonaa thih vanga hmeithaite an tel. Kum tin Chhamb Honour of Battle hi December 5-ah lawm ṭhin a ni a, kuminah erawh chuan remchan zawkna avangin nimin khan lawm a ni.