Duhlian tawng hi Mizote min phuarkhawmtu ni thei se-CM

December 6, 2016 aṭanga Zokhawthara ZOFEST 2016 hman chu Ningani khan a ṭiak a; a tawp nía khuallian, chief minister Lal Thanhawla chuan, Mizo ṭawng (Duhlian ṭawng) chu Mizote phuarkhawmtu ni thei se a duh thu a sawi.

Chief Minister chuan, Mizo ṭawng chu Zo hnahthlakte ṭawng hman tam ber leh hriat tlanglawn ber a nih thu sawiin, "Duhlian
ṭawng hi a neitu bik kan awm lo a, a neitu vek kan ni tih kan hriat a pawimawh. Zo hnah-thlakte min phuarkhawmtu ni thei se ka duh. Duhlian ṭawng mi ṭhenkhatte'n an thiam loh avangin an Zo hnahthlak nihna a bo lo. Min tuam khawmtu a nih angin, er mai loin thiam tlân kan tum phawt chuan Pathianin min tiropui zel ang tih ka ring," a ti.

Hmun danga awm hnam tlém zawkte Zo hnahthlaka seng luh a pawimawh tih sawiin Lal Thanhawla chuan, "Zo hnahthlakte hi kan inhloh a thiang lo a, kan inchán tur a ni hek lo. Kan awmna ṭheuha inngeih taka kan awm a ngai. Kan inkarah buaina kan neih chuan kan intei tê ang tih a hlauhthawnawm," a ti a; Zo hnahthlakte ṭanrual a pawimawh thu a sawi.

CM Hawla chuan, Zo hnahthlakte chu rorelna pakhat hnuaiah awm lo mah se, Pathianin a hûnna ram ṭheuha ringtu an nih angin khua leh tui ṭha, rinawm leh ṭangkai an ni tur a ni tih sawiin, "Engtik emawah chuan Pathian hian Zo hnahthlakte hi rorelna pakhat hnuaia min la awmtir ka ring a, tun aṭangin inpumkhat zai rèl a, kan inlaichinna leh kan inunaunate tichak turin kan ngaihtuahna leh rilrute sênga hma kan lak a ngai," a ti.

Ramri hung chungchang sawiin Lal Thanhawla chuan, "Khawtlang lamah Bangla-desh nen kan ramri chu hung a ni a, hei vang hian kan ram eng emaw zat kan chán hi a pawi hle. Khawchhak lamah hetiang ramri hungna hi kan chenna ram sorkarte hian tum mah se, kan duh lo a, kan dodal reng a ni," a ti a; Zo hnahthlakte inzawmna dâltu reng reng chu dodal tlat tur a nih thu a sawi.

ZOFEST tawp ní hian Indian Footballer of the Year Jeje Lalpekhlua leh Mizo hmeichhe zinga Mout Everest láwn chhuak hmasa ber Lalrintluangi te hnenah chawimawina hlan a ni.

MZP buatsaih ZOFEST-ah hian India state hrang hrang bakah, Bangladesh leh Myanmar aṭangin palai 1,400 vel an tel a; hnam hrang hrangte'n an hnam làm leh incheinate an entir a ni.