Tourism-in RTI Act an chhânna siam ṭha

Tourism department chuan, tourist lodge leh highway restaurant-te mimal kuta hlan (privatisation) chung-chang RTI Act hmanga zawhna an chhannaah tihsual palh a awm tih an tarlang a, RTI Act hmanga zawttu hnenah tihdikna an pe.

Zawhna chhanna hmasaah Bairabi Tourist Lodge chu chhangtu mi 11 an awm anga tarlan a nih laiin, tihdiknaah chuan mi 13 an ni a, mi pahnih hming ziah hmaih a nih thu tarlan a ni. Chhanna hmasaah tourist lodge chang tura pek tak Lalnunzira, Khatla Bethel hming vawi khat ziah lan a nih laiin, tihdiknaah chuan Lalnunzira hian tender chu chi hnihin a chháng tih a lang a; a chhanna zatte chu pakhatah Rs. 3,000 leh pakhat dangah Rs. 20,000 a ni.

Lalnunzira'n Rs. 3,000 leh Rs. 20,000-a a chhànnaah hian a khawi zawkah nge pek a nih sawi lan a awm lo mah se, tourist lodge enkawltute'n thla khata sorkara sum an chhun luh tur zat tarlanah Rs. 3,000 tih a ni a; hei vang hian Rs. 20,000-a a chhanna chu thlang loin, Rs. 3,000-a a chhânna zawk an thlang tihna a ni.

Bairabi Tourist Lodge chhangtu zingah Rs. 15,000-a chhangtu pahnih, Rs. 22,100, Rs. 14,000, Rs. 13,000 leh Rs. 11,000-a chhangtu mi pakhat ṭheuh an awm bawk.

Chhanna hmasaah Buhchang Tourist Lodge tender chhangtu chu Vanlalhruaii, Republic Vengthlang leh Than-sanga, Dawrpui anga tarlan a ni a; chhanna hnuhnungah chuan Van-lalhruaii (Vanlal-hruaia tih zawk tur) hian Buhchang TL a chhang lo a, Luangmuala Tourist Home zawk a chhang. Chutih laiin, a hmaa Sakawrdai Tourist Lodge chhangtu anga tarlan Lallianzuali tih chu Buhchang Tourist Lodge chhangtu zawk a ni. Hei vang hian Buhchang TL hi tender chhang sang zawk Thansanga (Rs. 1,050) pek a ni tih a lang.