Mizoram mutàn ber sum awlsam léngvâk - Minister Lalsawta

Finance minister Lalsawta chuan, Mizoram mutàn ber chu sum awlsam léngvâk a nih thu leh sum léngvâk chu miin an buaipui nasat thu a sawi.

Nimina Congress Bhavan-a inkhawmah thu sawiin Lalsawta chuan, "Sum léngvâk kan buaipui nasa a, hei hian hna thawh tak tak tum loin, nun ve chang chang theihna tur dapin mi tam zawk hi sum awlsam buaipuiin kan phusa nasa hle. Thawhrim aia léngvâk, daihlim hnuaia awmte’n sum an hmuh zawk tlat chuan hna thawk tak tak mi an váng. Hna thawh tak takna ramah Mizoram hi kan siam loh chuan kan dingchhuak thei lo ang," a ti.

MNF leh party dangte'n ram rorelnaah thuneihna chan an châk chhan chu anmahni leh an vua leh vângte inhaivûr an duh ṭhin vang nia sawiin Lalsawta chuan, "Keini erawh chu chutiang chu kan sorkar chhan a ni lo a, a pawimawh ber chu sorkar hian ram chungchangah thu kan nei hi a ni," a ti a; ram hman thiam dan azirin ram neitute'n hausakna leh sum lak luhna an nei ṭha thei tih a sawi.

Minister of state C Ngunlianchunga pawhin thu sawiin, an party chu 'Rorelna dik leh felna chu luipui kang ngai lo angin luang rawh se,' tih thupui nei an nih angin chumi kawng zawh chuan an pên zel niin a sawi a, "Kan Chief Minister, ram páwna Zo hnahthlakte pawhin Mizo hnampa anga kan pawmziate pawh Zofest-a Zo hnahthlak unau fuankhawm aṭangin ka hmu a ni," a ti.

C Ngunlianchunga chuan, Mizoramah zu zawrh a nih tâk avangin tun hma lama Rihdil vela Mizo ṭhalaite'n zu an buaipui nasa ṭhin leh Mizoram pelh hleka zu ruih tur emaw an tih ṭhin- na chu a bo tawh niin a sawi a, "Zu zawrh ṭan dawnah tute'n emaw insawiṭhaih a, khawlaiah nunau leh hmeichhiate an chhuak ngam lo ang an tihte chu a tak a thlen chuan a ni lem lo," a ti bawk.