Sum vàngin mipui an mangang - Zorama

MNF president Zoramthanga chuan nimin khan Samlukhai khuaa Aizawl South-III MNF Block Conference a hmanpuinaah thu sawiin, MNF sorkar lai aiin Congress sorkarah budget a let rukin a tam tawh zawk a, mahse, sum a váng a, ram mipui an mangang tak zet niin a sawi.

Zoramthanga chuan, sorkar department-te'n hna thawh leh hmalakna tur sum an neih loh avangin an châwl ṭhuap ringawt nia sawiin, "Sor-kar hnathawkin hlawh an la thei lo a, MR bill, workshop bill, contact/supply bill leh GP Fund thlenga lak theih a nih loh lai leh kawng a chhiat em em laiin an hotupa berte nupa chu helicopter-ah an chuang reng bawk si a, mipuiin an kham tawh tak zet a ni," a ti.

MNF President chuan, Congress sorkarah contract leh supply hna lian awm zawng zawng vai company lian an thawhtir vek nia sawiin, "Congress party contractor/supplier-te pawh an beidawng tawh a, anmahni ngei pawhin he sorkar hi an khamin an beidawng tawh tak zet a ni," a ti. Sorkar chu Hnahlana grape chíngtute sawisa ral ṭhakah a puh.

Zoramthanga chuan, nikum leh kuminah zu vangin police 250 chuang an thi tawh nia sawiin, "Rál kut emaw, tar thi leh natna dang vanga thi an ni lo. Mipui pawh a sang bìin zu vangin kan thi zawih zawih a, hmeithai leh fahrah an pung chak em em a, pastor leh kohhran hruaitute an mangang tawh hle a ni," a ti bawk.

MNF thuchhuah chuan, nimina Samlukhaia inkhawmah hian Cong-ress leh ZNP aṭang-in an party zawm thar mi thar 42 an lawm lut niin a tarlang.