Governor-in Bilkhawthlir WSS a hawng

Bilkhawthlir (Pumping) Water Supply Scheme chu nimin khan Water Treatment Plant, Chemphaiah Governor Lt.Gen. Nirbhay Sharma-a'n a hawng. Larsap chuan, tui chu nunna hnár a nih avangin Kristiante tan tui humhalh chu an tih tur dik tak a nih thu a sawi.

Governor chuan, Bilkhawthlir WSS hlawhtling taka siam a ni chu a chhawrtu mipuite a lawmpui thu a sawi a, "Mizoramah ruahtui a tla tam a, kum khatah thla ruk aṭanga thla sarih chhung ruah a sûr ṭhin. Ruahtui tam hi kan humhalha kan vawn ṭhat thiam a ngai," a ti a; tui hlutna tak hre tur leh fimkhur tak leh ren thiam taka tui hmang turin mipui a chah.

Nirbhay Sharma chuan, Mizoram hmun tam takah tui harsatna a la awm thu sawiin, tun dinhmun chauh ngaihtuah lo a, kum 15-20 lo la kal tura tui thianghlim hnianghnâr taka neih theih dan tur ngaihtuah a ṭul thu a sawi a; sorkarin nasa takin mipui hnenah tui thianghlim pe turin ṭan a la tih sawiin, "Tui chungchangah hian mipui, kohhran leh tlawmngai pawlte ṭangkai taka an thawh chhuah reng a ngai," a ti.

PHE minister Zodintluanga pawhin thu sawiin, "Bilkhawthlir hi tui in harsa em em a, Kolasib aṭangin indaih lo takin a hma chuan tui in la ṭhin. Tuna tui lakna tur ṭha in nei ta hi Zoram mipui pawhin an lawmpui cheu ka ring," a ti.

Bilkhawthlir WSS hi NLCPR aṭanga sum hmuh cheng nuai 780.47 sênga siam niin, a siamna sum chu Central-in 90% leh Mizoram sorkarin 10% an tum. Kum 2011 chhiarpuiah Bilkhawthlirah mi 5,020 an awm a, project hian kum 2041 thleng mi 9,090 châwm thei tura ngaih a ni a; mi pakhat tan ni tin tui litre 70 pe tura duan a ni. WSS siam hna hi September 30, 2011-ah ṭan niin, January 26, 2016-ah zawh a ni a; contractor chu Gangwal Engineering & Construction Pvt. Ltd., Silchar an ni.