Proficiency Award in English sem a ni

SCERT chuan nimin khan an auditorium-ah Proficiency Award in English lawmman hlanna leh Poerty Writing Festival an buatsaih a; School Education minister H Rohluna'n a hmanpui.

Inkhawm hi SCERT director Laldawngliani Chawngthu-in a kaihruai a; School Education Minister chuan, "Kan zirna atan English a pawimawh em em laia English thiamte chawimawina hlan nacháng SCERT-in an hria hi ka chhuang tak zet. Mizoram tan heng zirlai chhuanawm takte hi mi ṭangkai tak an nih la ni ngei dawn a ni," a ti.

SCERT tutor Lalduhawmi Thomte sawi danin, Poetry Festival hi kum 2011 aṭangin SCERT-in a buatsaih ṭan a, kum tin thupui an siam ṭhin. Kuminah hian higher secondary school pakua aṭang zirlai 46 an tel a, pakhatna chu Angela Dengtluangpuii (Mizo HSS) niin, Lalrinzuali Ralte (Synod HSS) leh Daisy Chinzah (St. Joseph HSS)-te chu pahnihna leh pathumna an ni.

Proficiency Award in English hi HSLC Examination, 2016-a English subject-a ti ṭha ber hnenah Rs. 5,000, pahnihna mi panga hnenah Rs. 3,500 ṭheuh leh pathumna mi pali hnenah Rs. 2,000 ṭheuh hlan a ni a; HSSLC Examination 2016-a ti ṭha ber hnenah Rs. 5,000, pahnihna mi pahnih hnenah Rs. 3,500 ṭheuh leh pathumna hnenah Rs. 2,000 a hlan a ni bawk.