SSC leh Aviation Training hawng

Mizoram Youth Commission (MYC) chuan nimin khan an training hall-ah SSC Coaching and Aviation Training an buatsaih a; minister R Lalzirliana'n a hawng.

R Lalzirliana chuan, "Mizo ṭhalai tam tak, thiamna pea hlawh sang taka India ram chhung leh páwn thlenga hna hmuhsaktu MYC hnathawh hi Mizo hnam tan malsawmna a ni. Hnathawk
ṭha leh fak tlakte chawimawi harsat si, mi dangte chêt chhiatna sawi awlsam leh nun thlak danglam a hun. Hnathawk ṭha leh mi chhuanawmte hian kan chawimawi an phu a ni," a ti.

Mizoram a ṭhan belh dawn lo tih sawiin Lalzir-liana chuan, "Mipui kan pun zel avangin kan eizawnna bialte pawh kan zauh ve zel a ngai. Kan
ṭhalaite tan Mizoram páwn leh khawvel hmun hrang hrangah eizawnga hna an thawh theihna tura hmangcháng leh thiam-thil zirtirna buatsaih hi sorkar-in a ngai pawimawh tak zet a ni", a ti a; mi dangte ruala hmasawn ve duh tan thliarkar rilru kalsan a hun thu a sawi.

MYC chairman T Sangkunga pawhin thu sawiin, "Mizo ṭhalai sang tam tak sorkar hmalakna hnuaia traning-te neihpui an nih hnuin India ram chhung leh páwnah hna an thawk tawh. MYC hnuaia training kalpui-te chu sorkar sum tihek loa kalpui a ni. Zirlaite senso leh zirtirna senso chu sorkar laipui hnuaia skill development scheme hrang hrang Mizoram sorkarin a hai chhuah aṭanga tumsak a ni," a ti.

SSC Coaching hi Staff Selection Commission (SSC) hnuaia hna zawngtute tana buatsaih a ni a, tun hi batch lina niin, zirlai 150 tan seat siam a ni. NERLP leh MYC thawhhona hnuaia Aviation Training hi batch khatna a ni a, zirlai 100 tan seat siam a ni thung.