Mizo ṭawng zirhona buatsaih

Mizo Academy of Letters (MAL) chuan nimin khan IPR Auditorium-ah Mizo ṭawng zirhona hun an buatsaih a, Art & Culture minister R Romawia'n a hmanpui.

Art & Culture Minister chuan, Mizo ṭawng dik humhalh a pawimawh rualin, duh fîr lutuk leh nawr chêp lutuk emaw, phalrai lutuk emaw a hlauh-awm thei tih sawiin, "English-te'n hnam dang ṭawng an seng luh belh zel aṭangin an ṭawng an tihausa thiam a, French hote erawh chuan khua leh tui nihna phal zauin hnam hrang hrangte an hnamah an seng lut thiam a ni," a ti.

Mizo hnam leh ṭawng humhalh tum danah chian a pawimawh tih sawiin R Romawia chuan, "Naupangte'n zirna bul an ṭan nan English medium kan thlang uar ta hian Mizo ṭawnga hma kan sâwnna tur a dâl niin ka hria," a ti a; ṭhalaite zingah English leh Mizo ṭawng pawh a enga mah thiam bel lo ve ve an tam chu pawi a tih thu a sawi.

Seminar hawn inkhawm hi MAL president Lalthangfala Sailo-in a kaihruai a; Minister chuan BT Nghinglova lehkhabu ziah pathum - 'Fakna Hla Thlankhawm' tih te, 'Eden-ah i kîir ang u' tih leh, 'Chanchin Ṭha Thurûk' tihte a tlangzarh.

Seminar-ah hian YMA branch hrang hrang aiawhte leh MAL member-te an tel a; mithiamte thuziak an zirho a ni.