HSS Games champion - Mizo HSS

Mizoram HSS games vawi 15-na, December 6, 2016-a ṭan chu nimin khan Lammualah khâr a ni a; khârna inkhawm hi School Education secretary P Lalchhuanga leh director K Lalthawmmawia ten an hmanpui. He inelnaah hian Mizo Higher Secondary School chu pakhatna an ni.

P Lalchhuanga chuan, zirlaite chu an zirna tibahlah thei thil hrang hrang laka inthiar fihlim tur te, mahni inthunun ṭha tur te, an zirna tibuai theite buaipui lo turin a chah a; Games-a zirlai infiammite chu an medal lakah duhtawk mai lo a, hlawhtlinna sang chan tum tur leh Mizoram tihmingṭhatu nih tum turin a fuih.

K Lalthawmmawia pawhin zirlai tan taksa leh rilru hrisel neih a ngaih thu sawiin, chuvang chuan sorkarin School Education department-a Physical Education Wing hmangin sum harsa tak chungin annual sports, zonal sports, secondary school games, higher secondary school games-te a buatsaih ṭhin thu a sawi.

Intihsiaknaah hian sports discipline chi sarih - athletics, badminton, basketball, football, table tennis, taekwondo leh volleyball-ahte intihsiak a ni a; HSS 27
aṭangin zirlai 1,061 leh zirtirtu 129 an tel.

Athletics (mipa)-a gold medal pahnih leh bronze medal pakhat latu Lalrosanga, Mizo HSS chu Best Athlete (Boys) a ni a; hmei-chhiaa Best Athlete chu gold medal pathum, silver pakhat leh bronze pakhat latu Lalhmunmawii, Thenzawl HSS a ni.

MEDAL TALLY TOP 10

# School G S B Total

1. Mizo HSS 13 11 6 30

2. Mamawii HSS 7 0 2 9

3. Thenzawl HSS 4 4 2 10

4. GM HSS 3 4 1 8

5. Republic HSS 3 3 4 10

6. Chaltlang HSS 3 1 2 6

7. KM HSS 2 5 4 11

8. Synod HSS 2 3 2 7

9. Serchhip HSS 1 1 3 5

10. Lunglei HSS 1 0 3 4