MZP-in MP C Lalrosanga leh HM Amit Shah lim an hâl

Mizo Zirlai Pawl (MZP) chuan an dodal mek Citizenship (Amendment) Bill, 2019 (CAB) chu Parliament in hnihah pass a nih tâk avangin nimin khan Vanapa Hall kawtah Union Home minister Amit Shah leh Mizoram Lok Sabha MP C Lalrosanga lim (thlalak) an hâl.

Lim hâl hmaa thusawitu MZP president B Vanlaltána chuan, Mizoram MP C Lalrosanga'n CAB thláwp zawnga vote a thlâk chu an dem tak zet thu sawiin, "Mizo mipui, hmarchhak mipuiin kan do a, kohhrante an ṭawngṭai chunga kan aiawh tura kan thlan tlinin a thlang tlingtu leh kohhrante a zah lo hi ná kan ti. Chuvangin, hreh tak chungin a lim kan hâl dawn a ni," a ti.

B Vanlaltána chuan, Mizoram Lok Sabha MP thil tih dan chu tun hnuah thleng tawh lo se an duh thu sawiin, "Kohhran leh mipuite duh dan zah ni tawh rawh se. Pu C Lalrosanga a lo haw hunah pawndum nen kan lo hmuak dawn a, Rajya Sabha MP Pu Ronald Sapa Tlau chu CAB a do avangin tawlhlohpuan nen kan lo hmuak ang," a ti a; CAB an donaah thláwp zel turin Mizoram mipui a ngen.

North East Students Organisation (NESO) financial secretary Ricky Lalbiakmawia pawhin thu sawiin, MP inthlan dawnah MNF candidate C Lalrosanga'n CAB chu a tàwp thlenga do turin a inzawrh thu a sawi a, "A vote tlingtute buma a phatsan hi kan ngaidam thei lo. CAB hi NESO chuan Supreme Court-ah kan khing dawn a ni," a ti.

Ricky Lalbiakmawia chuan, Mizoram a huam loh avanga CAB sawi him phêt tum an awm tih sawiin, "Direct-in min nghawngna nei lo mah se, indirect-in kan tuar dawn," a ti a; intifing tak taka CAB-in Mizoram a huam loh vanga Mizote leh Mizoram a him nia sawi ṭhinte chu thil an hriat chian tâwk loh vang a nih thu a sawi.

Mizoram Lok Sabha MP C Lalrosanga lim (thlalak) an siam chu MZP President-in a hâl a, Home minister Amit Shah-a lim chu NESO Financial Secretary-in a hâl thung a ni.