MNF leh Lok Sabha MP-in Hindu lal ram Dinna atan Mizoram an hralh - MPCC

13th December, 2019

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar thehdarhtute an kâwm a; MNF leh Lok Sabha MP C Lalrosanga chu Hindu lalram dinna atana Mizoram hralhah an puh.

MPCC Media department secretary C Lalhriatpuia chuan, Congress party chu India rama sakhaw zalenna a taka kalpuitu, hnam leh sakhaw tênau zawkte thlavâng hauh ṭhintu a nih thu sawiin, "CAB 2019 pawh hi India ram, Hindu lalrama din tura BJP ruahmanna a nih avangin a tir tê aṭangin na takin a do a, Parliament-in hnihah pawh CAB dotu lian ber chu Congress a ni. MPCC pawhin nasa takin a lo dodal tawh ṭhin," a ti.

C Lalhriatpuia sawi danin, MPCC president Lal Thanhawla'n chief minister a nih laiin Union Law & Justice minister Ravi Shankar Prasad leh Parliamentary Committee on CAB chairperson Dr Satyapal Singh hnenah lehkha thawnin, Mizoramin CAB a duh loh thu a lo hriattir tawh a, Congress sorkar lai, June 28-29, 2018 ah Mizoram Legislative Assembly session-ah CAB dodalna resolution pass a ni.

MPCC Media Secretary chuan, Mizoram mipui, NGO-te leh kohhranin CAB nasa taka an do mek lai leh, Presbyterian kohhranin Synod inkhawmpui rorel anga Pathianni zan (December 8, 2019)-ah kohhran inkhawmah an ṭawng-

ṭai rual laiin MNF party-in CAB an thlâwp a, an MP C Lalrosanga pawh CAB thláwp zawngin vote an thlaktir tih a sawi a, "Mipui zahna pakhatmah an nei loah kan ngai," a ti.

C Lalhriatpuia chuan, CAB thláwp zawnga MNF-in an MP vote an thlaktir lai mekin CAB dodal nana MZP huaihawt total bandh-ah MNF sorkara minister leh MLA ṭhenkhat an tel tih sawiin, "Mipui hmuha hmai phih fai tumna maiah kan ngai," a ti a; Hindu lalram din nan MNF leh MP-te'n Mizoram leh Mizo Kristiante an hralh ta tih chu MPCC ngaihdan a nih thu a sawi.

CAB-in Mizoram a huam loh avangin Mizoram a him ta tihna a ni lo tih sawiin C Lalhriatpuia chuan, "Assam leh kan chhehvel state ṭhenkhat a huam miau avangin chîmral hlauhawma kan awm dan hi a la ngai reng. Mizo Kristian-te hian keimahni chauh ni loin, India ram hmun hrang hranga nêkchêpna kara awm mek kan Kristianpuite himna tur hi kan ngaihtuah a ngai," a ti.

Zawhna chhangin Congress ṭhalai president Dr Lalmalsawma chuan, MNF lama an hotute tihtir ni lo se C Lalrosanga'n ama thuin CAB a thlâwp loh tur thu a sawi a, "Party aṭanga thlan tlin a ni a, an thu ang ni loa vote a thlak a nih chuan action an la tur a ni. BJP leh RSS duh dana an kal hi pawi kan ti hle," a ti a; MNF chu Mizo National Front inti ngam tur an nih tawh loh thu a sawi.