MP C Lalrosanga'n CAB a thláwp hi A tih tur dik tak a ni - MNF

Mizo National Front (MNF) party chuan thuchhuah siamin, Mizoram Lok Sabha MP C Lalrosanga'n Citizenship (Amendment) Bill (CAB) a thláwp chu a tih tur dik takah an ngaih thu an tarlang a; CAB-in Mizoram a huam ta lo chu lawmawm an tih thu an sawi.

MNF chuan, Mizote'n an enghelh em em CAB-in Mizoram a huam ta lo tih sawiin, "Hemi chungchangah hian mi tam tak sawisel hlawh chungin MNF chuan NEDA/NDA luhkhungin, a chhúng aṭangin nasa takin CAB a dodal a. Kan CM Pu Zoram­thanga'n rem leh rem lo pawh ngaihtuah loin CAB-in Mizoram a huam loh nan Prime Minister leh Home Minister-te a sawipui ngun hle a, kan MP Pu C Lalrosanga hmalakna pawh a chhuanawm tak zet a ni," an ti a; NGO, kohhran leh Mizoram mipuiin lungrual taka CAB an donain rah ṭha a chhuah niin an tarlang.

NGO Coordination Committee (CYMA, MUP, MHIP, MZP, MSU) pawhin December 6, 2019 khan Union Home Minister-in ILP nei state leh scheduled area-te a huam loh tur thu a lo hrilh avangin lawmawm an tih thu thuchhuah siamin an lo tarlang tawh tih sawiin MNF chuan, "CAB-in Mizoram min huam teltir tâk loh avanga Mizoram MP Pu C Lalrosanga'n Prime Minister leh Union Home Minister-te hnenah lawmthu sawi a, lawmna entirna'n CAB a support ta hi a tih tur tak a ti-ah MNF chuan a ngai a ni," an ti.

MNF party chuan, "Tunah chuan CAB hi Parliament-in hnih kaltlangin pass a ni ta a, President-in pawmpuina hming a ziah zawh chuan India ram dan ni mai tawh tur a lo ni ta," an ti a; Mizorama dan chelek ve theih loh tur a ni ta leh Mizoram a huam tel ta lo ringawtah MNF chu an lawm thu leh Mizoram mipui pawh an lâwm tura an ngaih thu an tarlang a ni.

Tarlan tawh angin, December 9, Thawhṭannia Lok Sabha-a CAB sawihonaah Mizoram MP C Lalrosanga chuan CAB a thlàwp thu a sawi a; CAB-ah Mizoram huamtir a nih loh avanga lawmthute a sawi hnuah, "Home Minister zahawm tak hi India hmarchhak bial kaihhnawiha thu a tiam tawhte tipuitling ngei turin ka ngen a. CAB chungchangah, hmarchhak bial venhimna tura a lo tiam tawhte tipuitlin a, a takah chantir ngei turin ka ngen a ni. Chuvangin, kan lawmna tihlan nan he Bill (CAB) hi kan thláwp a ni," a ti. Thawhṭanni zanah vek Lok Sabha-ah hian CAB chu pass a ni.

CAB chu Rajya Sabha-ah December 11, Nilaini khan sawiho a ni ve leh a, Mizoram MP Ronald Sapa Tlau chuan Rajya Sabha inkhawmah thu sawiin, CAB chu Hindu lalram siam tumna a nih thu te, India hmarchhak bial leh Mizoram tan dan hlauhawm tak a nih thute a sawi hnuah, "CAB hi kan thláwp ve lo a ni," a ti thung.

Rajya Sabha-ah hian Mizoram MP leh MP dang eng emaw zatin CAB chu an duh loh thu sawi mah se, pass a ni ve ta tho a ni.