KHAWTHLIR

Project Pushpak Headquarters chuan nimin khan Pushpak Primary School, Falkland Vengah blood donation camp an huaihawt a, Aizawl Civil Hospital tan thisen unit 59 an pe. Thisen petute hi BRO mite leh Mizoram State Rural Livelihood Mission hnuaia Eccentric Solution Pvt.Ltd.-a training mekte niin, mipa 56 leh hmeichhia pathum an ni. Sairang Pastor Bial KṬP pawhin nimin khan Sairang Kohhran Hall-ah Synod Hospital tan thisen unit 36 an pe a, petute mipa 32 leh hmeichhia pali an ni.

Border Roads Organisation (Project Pushpak) chuan RIPANS nen ṭang dunin nimin khan Falkland Venga an hmunah a thlawna inentirna an buatsaih a, mi 500 chuang an inentir a, a ṭul angin damdawi a thlawnin an pe nghal a ni.

Tanpuina hlan 

Mizoram Cooperative Apex Bank chuan nimin khan Audrene Children Home, Khuangpuilam, Kolasib hnenah ṭanpuina Rs. 30,000 an hlân. MCAB hian kum tin naupang chanhaite pualin ṭanpuina hi an hlan ṭhin a ni. Audrene Children Home-ah hian naupang 46 leh thawktu 14 an awm mek.

New Market Chawhmeh Zuar Joint Association chuan Krismas thilpek atana an member-te thawhkhawm chu December 11, Nilaini khan home pathum - Bethany Childrens Home, Sihhmui, Operation Kingdom Ministry, Phunchawng leh, Horeb Retreat Center, Bethlehem-ahte an hlan a, Rs. 10,000 ṭheuh an pe. CZ Foundation, Treasury Square hnenah Rs. 5,000 an hlân bawk.

C Lalzova lehkhabu ziah, 'Mizo ṭawng ṭhat bikna' tih chu nimin khan Aizawl Press Club-ah adviser to chief minister C Lalramzauva'n a tlangzarh. C Lalramzauva chuan, kum 82 mi C Lalzova'n lehkhabu ṭha, Mizo hnam tana rohlu tling a tichhuak thei chu ropui a tih thu a sawi. C Lalzova hian a lehkhabu thar hi MJA Public Library-a dah turin a pe nghal bawk.