Aizawl hi hmeichhia leh naupangte tan pawh a ralmuang tawk - Chief Minister

Ministry of Defence hnuaia awm, National Defence College (NDC) a intuai-hriam mek India leh ram dang sipai officer Mizoram tlawha rawn zin mekte chuan nimin khan chief minister Lalduhoma a pisaah an kawm. CM chuan Aizawl chu khawpui ralmuang tak a nih thu a sawi.

Chief Minister chuan Understanding India Study Tour neia Mizoram tlawha lo zin sipai officer-te hi lawm thu a lo hrilh a, "Mizoram hi state ralmuang, ziak leh chhiar thiam vekna, eirukna tlemna, khualzinten nasa taka an tlawh mek a ni. Aizawl hi lirthei tam hle mah se, khawpui reh riai mai a ni. Hmeichhia leh naupangte tan pawh a ralmuang tawk. Tin, in kal velnaah kawng sirah Nghahloh Dawr in hmuin ka ring. Nghahloh Dawr hian kan ram ralmuanzia a tilang ve a ni," a ti.

Digital governance lama India rama hmahruaitu nih tuma sorkarin ke a pen mek dan te, kum 2047 -a India GDP a 1% thawh phak ve tuma Mizoram sorkarin hmathlir a neih thute leh hriat duh dang an neihte Chief Minister hian NDC-a intuaihriam mekte hi a hrilh a, an cham chhunga hun nuam tak hmang turin duhsakna a hlan.

Sipai officer-te hian Mizoram an hmuh dan Chief Minister hnenah sawiin, zawhna an neihte an zawt a, "Ram mawi tak a nih bakah a ralmuang a, mipuite an nelawm a, Mizoram hian tlawhtu a la ngah deuh deuh dawn a ni," tiin nuam an tih thu an sawi hlawm a ni.

NDC course kal laite hi brigadiers leh jt secretary tlukpui Army, Navy leh Air Force a mi te, India ṭhian tha ram thenkhat (friendly foreign countries) aṭanga rawn kal sipai officer-te an ni. An cham chhungin Mizoram sorkar hotulute an kawm ang a, hmun ṭhenkhat an tlawh bawk ang.