Lungleiah state university dah a nih ngei theihna atana hmalak chhunzawm dan tur rel

Mizoram State University Demand Committee (MSUDC), Lunglei chuan nimin MJA Committee Room-ah Lungleia Mizoram State University dah a nih ngei theih nan a hmalak chhunzawm zel dan tur an rel.

MSUDC chuan kohhran hrang hrangte ṭawngṭaipui tura an sawm bakah, state university chungchangah a rang thei ang bera thuthar thehdahtute kawm ṭha an ti a, chhim lam MLA-te hnenah state university chungchanga chak zawk a hmalak pui tura ngenna siam an tum a ni.

November 20, 2025-a HPC Conference Hall-ah chief minister Lalduhoma’n Lungleiah Mizoram State University din a nih tur thu leh Aizawl lama dah tura dan an lo siam tawh tih danglam a nih tur thu a sawi chungchangah MSUDC chuan, Assembly Session hmasa berah State University Bill thar pu lut a, pawm turin Mizoram sorkar an ngen nawn.

MSUDC chuan an thil phutah a hlawhtlinna hmel, a taka hmuh a nih hma chuan a tawp thlenga vil chhunzawm an tum. MSUDC-ah hian MZP, MSU, MJA, Chhimbial Chhantu leh Lunglei Ṭhalai Pawl an tel.