Martarte hi anmahni aia Mizo hnam Dah hmasatute an ni - Tawnluia

MNF party chuan Mizoram tana martar mi 10-te ruh tun hnaia an lak khawm chu nimin khan Martar Thlanmual, Luangmualah an zalh a, sûnna hun an hmang nghal. He hun hi MNF senior vice president leh deputy chief minister Tawnluia'n a hmanpui.

Tawnluia chuan, Mizo ram leh hnam tana martarte chu an zah a, an chawimawi tih sawiin, "Martarte hi mahni aia Mizo hnam dah hmasatute an ni a, an hluin an chhuanawm tak zet. An zahawmna leh an hlutna hi kan hre dawn chauh a, an hlutna milin kan chawimawi tâwk lo foin ka hria," a ti a; Mizo ram leh hnam tana nunna hlantute chu an taksa thi tawh mah se, Mizote thinlungah an nung reng dawn tih a sawi.

MNF Sr. Vice President chuan, vuivaina emaw an neih chángin martarte'n an nunna, an neih zawng zawng an hlanna leh an inpumpekna chu ngaihtuah ṭhin turin kal khawmte a chah a, "Chief Minister ngaihtuahna ang­in Martar Thlanmual hi mawi leh ṭha zawkin siamṭhat a ni dawn. Zoram mipui ta a ni a, a enkawl hna erawh chu MNF party hian kan kutken rih mai a ni," a ti. 

Tawnluia chuan, "SEDP-a kan ziah angin, martar chhungte leh zalenna suala pên chhuakte chhawmdawlna, a tlem emaw, a tam emaw ngaihtuah kan tum a ni," a ti bawk. Martarte sûnna inkhawm hi MNF treasurer K Vanlalauva'n a kaihruai a; martar chhungte'n thu an sawi bakah, an chhungte hriatreng nan MNF vice president Vanlalzawma'n Bible a hlân a ni.

Nimina Martar Thlanmuala an zalhte chu - Lalthara, secretary, Churachandpur; Ropianga, treasury officer, Venghlui; Chuauhnuna, accountant, Saitual; Rokhara, clerk, Champhai; Capt. Thangkunga, Vanbawng; Pte. Thangsangvunga, Aizawl; Sgt. Paṭhiauva, Bawngkawn; Vanlalenga, MNV, Chawngtlai; Piangthanga, MNV, Kelkang leh, Ngamjapo, Maojay, Manipur te an ni.