KHAWTHLIR

March 15 hmain huan/lo/ram hal tur

Aizawl district magistrate Lalhriatpuia chuan thupek tichhuakin, Aizawl district-a huan/lo/leipui/ram hâl turte chu March 15, 2026 hmaa hâl hman vek tur leh Lengpui Airport hnaiha huan/lo/ram neite chu tlai dar 4 hnu lamah chauh hâl turin a hriattir a; ṭha taka mei kawng sial tur leh huan/lo ram vah bak tih kâng lo turin a chah bakah, ramhnuaiah meichhem ti mit loa kalsan loh tur a nih thu a tarlang.

MLA-in lawmpui

Hrangturzo bialtu MLA Lalmuanpuia Punte, adviser to CM chuan a bial chhung mi Mizo zingah naupang lam doctor (super specialist in pediatrics critical care) hmasa ber Dr F Remthangpuii d/o F Lalchawimawia, East Lungdar chu a pisaah lawmpuina thingpui a inpui.

GZRSC blood donation camp

Govt. Zirtiri Residential Science College (GZRSC) NSS Unit leh Red Ribbon Club bultumin nimin khan GZRSC-a department panga zirlaiten Synod Hospital tan thisen unit 29 an pe a, petute mipa 25 leh hmeichhia pali an ni. GZRSC-a department panga dangten February 10, 2026 khian Synod Hospital-ah vek hian thisen an pe leh dawn.

Kumtling loa inneih khapna dan zirho

Serchhip district Women & Child Development district programme officer Lalthlamuani Rokhum chuan nimin khan Serchhipa Sub Hqrs YMA Hall-ah ni 100 chhung awh tur kumtling loa inneih khapna dan inzirtirna a hawng. Lalthlamuani chuan, India ram hmun dangah kumtling loa inneihna a hluar thu a sawi a, "Mizoramah pawh zaa za kan fihlim tawh lo a, kumtling loa inneihna hian retheihna, fahrah leh sualna thlengin a tipunlun thei," a ti. Mithiamten danin kumtling loa inneih a khap dan leh hremna te, Mizo hnam dan leh POCSO Act chungchangte kalkhawmte an zirtir a ni.