Lungleia UDPA dept hmalaknate sawiho

February 4, Nilaini khan Urban Development & Poverty Alleviation (UDPA) director Jacob Lalawmpuia leh Lunglei Municipal Council (LMC) hotute chuan LMC BoC Hall-ah Lunglei khawpui chhunga UDPA department hmalakna hrang hrang an sawiho.

Ṭhutkhawm hi LMC chairman Lalzuithanga'n kaihruaiin, Lunglei khawpui bawlhhlawh paihna hman mek aṭanga bawlhhlawh leh meikhu chhuak ṭhinin Hauruang leh Sazaikawn khawtlangte tana harsatna a thlen thu tarlan niin, UDPA dept leh LMC hotute chuan hei hi pawi an tih thu leh chin fel vat theih an beisei thu an sawi.

He harsatna hi tihtawp leh chinfel a nih theih nana hmalak dan tur sawiho a ni a, he harsatna hi pumpelh turin felfai taka bawlhhlawh sawngbawlna hmun thar tur, Solid Waste Management Centre chu zawhfel ṭep a nih thu leh centre-a khawl hman turte pawh ngaihtuah mek a nih thu tarlan a ni.

Ṭhutkhawm zawhah Lunglei Solid Waste Management Centre-I sak mek leh Lunglei bawlhhlawh paihna hmun chu UDPA Director, LMC vice chairman K Lalrinawma leh councillor-te, LMC leh UDPA official-te leh Sazaikawn Local Council-te nen tlawh nghal a ni.

Bawlhhlawh inchhek khawm sa buaipui dan tur enho niin, Legacy Waste Remediation Project chu a hma thei ang bera kalpui a nih theih nan bawlhhlawh paih lailawkna hmun tur enfel a ni.

Legacy Waste Remediation Project-ah hian bawlhhlawh inchhek khawm sa chu Pollution Control Board-in dan an duan sa ang thlapa singsak a, bawlhhlawh inchhek khawm sate pawh hai chhuah vek tura ruahman niin, project hi a hma thei ang bera ṭan tura tih a ni.