Aizawlah AI Pre-Summit buatsaih

Nimin khan ni hnih awh tur Artificial Intelligence (AI) Pre-Summit chu Indian Institute of Mass Communication (IIMC), Aizawlah ṭan a ni.

AI leh media tih thupui hmanga AI Pre-Summit huaihawt hi India AI impact Summit, 2026 lo awm tur atana India hmun hrang hranga a bulṭanna tura lo buatsaihna a ni. IIMC Aizawlah hian IIT, Bombay leh Ministry of Electronics & Information Technology-te nena buatsaih a ni.

Summit-ah hian IIMC Aizawla regional director charge la mek tu, IIMC Aizawla Officer in Charge (OSD) Nampibou Marinmai chuan inlawmna thu sawiin IIMC Aizawlin AI Pre-Summit a thleng thei chu lawmawm a tih thu a sawi a, "He summit hian ram hmasawnna tura AI hman ṭangkai dan leh chiang zawka hriat kawngah nasa taka a puih ngei ka beisei," a ti.

AI Pre-Summit-ah hian MZU-a Department of Mass Communication aṭangin professor Irene Lalruatkimi, MZU IT department atangin associate professor Dr R Chawngsangpuii, IIT Bombay-a data manager Nitish Singh, The Frontier Despatch editor Adam Saprinsanga, marketing strategist Angela Roy, tech influencer Caleb Friesen leh IIMC assistant professor Dr Jharna Brahma te'n AI chungchang anmahni hna leh subject hawi zawngin kawng hrang hrangin an sawi.

Mizoram University leh pawn lam aṭangin zirlai, research scholar leh AI kaihhnawih company hrang hrang aṭangin mi engemaw zat an kalkhawm a; zawhna leh chhanna hunte hman a ni.

AI Pre-Summit hi vawiinah chhunzawm tur niin, workshop buatsaih a ni ang. IIMC hi India rama media lam zirna hlun tak, Ministry of Information & Broadcasting hnuaia din niin, Aizawlah chuan Mizoram University ramchhungah North East Regional Campus a awm.