Jal Arpan Diwas hman a ni

Zokhawthar VC House-ah nimin khan Jal Jeevan Mission (JJM) hnuaia tui hnianghnar pek lawmna leh WATSAN Committee kuta hlanna (Jal Arpan Diwas) hman a ni a, additional DC James Lalnithanga'n a hmanpui.

James Lalnithanga chuan, Zokhawthar chu Mizorama tlawhtu ngah berte zinga mi a nih thu sawiin, "Tui thianghlim a neih hi a ṭul mai ni loin, Mizoram hmel tihlanna a ni tel a, India ram anga ngaihtuah pawhin kan ramin inrelbawlna ṭha a nei tih lantirtu a ni tel nghal. PHE deparment hmalakna hian Zokhawthar khawtlang tan hriselna a thlen ngei ka beisei a, tui aṭanga natna kài ṭhinte a ziaawmin, khawtlang nun pumpui chawikang se ka duh takzet," a ti a, Zokhawthar khawtlang chu a vawnhim leh enkawl kawngah te, tui renchemna lamahte ṭan la zel turin a sawm.