Thingtlang hmasawnna tura ruahmanna kalpui dan leh hmalakna an thlirho

Nimin khan Lunglei bawrhsap Navneet Mann kaihhruaiin, Lunglei DC Conference Hall-ah Lunglei district chhunga thingtlang hmasawnna tur ruahmanna (rural development scheme) hrang hrang kalpui dan leh hmalakna dinhmun thlirho a ni.

District Rural Development Office (DRDO) leh Block Development Office (BDO)-te hma lakna report ngaihthlak niin, hmasawnna tur leh ṭan lak ngaihna laite, harsatna hrang hrang chin fel dan turte sawi ho a ni.

Navneet Mann chuan Lunglei district-a thingtlang khuate hmasawnna tura DRDO leh BDO-te kal tlanga hma lakna chu ṭha thawkhata a hriat thu sawiin, thawktute inpekna a fak a, "RD scheme hnuaia thawktute inkarah leh department dang nena thawhhonaah inlaichinna leh thawhhona ṭha tak vawn nun zel a pawimawh," a ti.

Scheme hrang hrang hnuaia hmeichhiate dinhmun chawikanna lam ngai pawimawh tur te, mipuite'n scheme hrang hrang an hriat chian nana inzirtir uar tur te, hna reng reng ṭha tak leh tlo tak a nih theih nana vil uluk turte leh sorkarin hlen chhuah tura a tukte ṭha taka hlen chhuah tum zel turin Bawrhsap chuan thawktute a chah.

Lunglei DRDO project director Zoramdini chuan thawktute inpekna leh ṭhahnem ngaihnaah lawm thu sawiin, an hna thawh ṭha tak chu chhawm nung zel a, hmasawn zel tum turin a chah a, "RD scheme hrang hrang chu DC leh DRDO aṭangin ṭha taka vilpui reng a ni. Harsatna in neihte inthlahrung loin thlen zel rawh u," a ti.

Thlirhonaah hian Lunglei district chhunga RD block pali — Bunghmun, Lunglei, Lungsen leh Tlabung block-a Mahatma Gandhi National Rural Employment Guarantee Act (MGNREGA), Pradhan Mantri Awaas Yojana – Gramin (PMAY-G), Mizoram State Rural Livelihoods Mission (MzSRLM), Lakhpati Didi Initiative, Pradhan Mantri Krishi Sinchayee Yojana (PMKSY) leh scheme hrang hrang kal tlanga hma laknate thlirho a ni.

Lunglei District chhungah hian MGNREGA hnuaiah job card hman lai (active) 20,396 a awm. Tun kum kal mek (2025–26)-ah ni 92 inhlawhna siam tawh niin, ni 100 inhlawhna siam theih beisei a ni. Tun kum kal meka MGNREGA hnuaia hna thawh tur ruahman 2,714 zinga 2,331 chu thawh zawh tawh a ni.

PMAY-G hnuaiah kum 2016–2024 chhungin chhungkaw 3,278 chu in sak ṭanpuina pek niin, in 3,142 sak zawh a ni a; chhan hrang hrang vanga chhunzawm theih loh 101 leh sak mek 31 a awm.

Awaas+ 2018-a in sak ṭanpuina pek 1,108 aṭangin 1,027 chu sak zawh tawh niin, chhunzawm theih loh 69 leh sak mek 16 a awm bawk.