Sangha humhalh duhin Tlabungah kawngzawh

Khawthlangtuipuia sanghate gelatin leh dân phal loh hmanraw dang hmanga man ṭhinte an demzia tihlan nan Tlabung mipuite chuan nimin khan Tlabungah kawng an zawh.

Tlabung mipui pungkhawmte hian Tlabung damdawi-in bula kâwn aṭanga Bazar Bungkawn thleng kawng an zawh a; bomb leh dynamo hmanga sangha man ṭhinte thil tih an dem thu te, mi pangngai tih chia an ngaih loh thu te, mi ṭhenkhatin beihpui thlaka an humhalh laia gelatin hmanga sangha suat ṭhinte chu an thil tih pawizia hriaa ti tawh lo tura an duh thute hmangin an au rual a ni.

Khawthlangtuipui hi Tlabung khawtlangin beihpui thlaka an humhalh lai a ni a, sangha man phal lohna hmun 'No fishing zone' an siam a ni. Mahse, tun hnaiah bomb hmanga sangha bei ṭhin an awm a, chutiang ti ṭhinte chu rinhlelh nei mah se, mit ngeia an hmuh hman ṭhin loh avangin an la man thei lo tih an sawi.

Tlabung aṭanga thu dawnna chuan, dan bawhchhiaa sangha man ru ṭhin zingah Tlabung mite bakah, sorkar hna zahawm tak thawk ṭhenkhat pawh an awma an hriat thu a sawi bawk.