Krismas vuakvêta mante a rei lo berah Thla khat tàntir an ni dawn - HM Zira

Home minister R Lalzirliana chuan, Krismas lo thleng tur pualin nimin khan thuchah a tichhuak a; Krismas vuakvêta thil sual ti mante chu a rei lo berah thla khat tal jail-ah tàntir an nih dawn tih a sawi.

R Lalzirliana chuan, ruihhlo do turin sorkar, Central YMA, Police, Excise & Narco-tics department-te an thawhho thu sawiin, "Khawtlang a thianghlim zawk a, mipuite'n hlim tlang taka he hunpui hi an hman theihna turin tunah hian YMA branch tinte uluk takin an duty a, ruihhloa buai te, zu rûia buaina siamte Krismas vuakveta mante chu a rei lo berah thla khat chhung jail-ah tàntir tur an ni dawn a, mi tin fimkhur turin ka ngen a ni," a ti.

Hâlpuah leh a kaihhnawihte chu ṭul loa sum khawhralna, mi dang tana bengchheng leh ninawm mai a nih avangin zuar lo tur leh hâl lo turin mi tin ngenin HM Zira chuan, "Silai lem, a mu kâp chhuak thei, mit inkah chhiatsak theihna ang chite pawh zuar lo turin DC tinte'n thupek, dan thlawhchhan neiin an chhuah a ni," a ti a; thupek zâwm lote hrem theih an nih avangin dan leh thupek kengkawhtute thu zâwm turin mipui a ngen.

Home Minister chuan, "Kristiante hunpui Krismas chu a lo thleng leh dawn ta der mai. Kum dang ang bawkin sorkar lam aṭang chuan hâlpuah tel lo Krismas leh kumthar hman kan duh. Hâlpuah leh a kaihhnawih hian kan tan thil ṭha a thlen lo a, kan sakhuana nen inzawmna a nei hek lo," a ti.

Isua pian champha lawm tura inbuat-saihnaah Isua Krista rilru leh duh dan loa kal vak chu thil hlauhawm tak a nih thu sawiin R Lalzirliana chuan, Krismas hmannaah remna leh muanna hnuaiah mite tana malsawmna nih theihna kawng hrang hrang ngaihtuah a, induhsakna thilpekte mi chanhai zawkte hnena hlân turin mipuite a sáwm a ni.

HM Zira chuan, kum kal ta lamah sorkarin veng chhung cheia lawmmante siamin hun a buatsaih ṭhin tih sawiin, "Aizawl khawpuite a mawi ngei mai, kumin erawh chu chutiang chuan a ni ta lo. Sorkar lam aṭanga lawmman dawn tur a awm loh vanga kan vengte kan chei mawi lo a nih chuan nausen lo pianga chu kan hre chiang tâwk lo a ni ang tih a hlauhawm hle. Chuvangin, veng chhung tihfai leh chei mawi lamah ṭan i la thar leh ang u," a ti.

Home Minister chuan, "Kumin chu dam têin kan hmang ral leh mai ang a, a uiawmin hunpui lo thleng turte a nghahhlehawm hle lai hian, hun inherin dan pangaiin a liampui leh mai dawn a ni. Chuvangin, mi tinin tun hun hi kan hman ṭhat a pawimawh hle. Hun kal tawh a siamṭhat theih tawh loh a, nakkin huna mi tur pawh tun kan hun hian a rawn her chhuahpui dawn avangin kan ni tin hun hi a ṭha thei ang bera hmang turin i inbuatsaih thar ang u," a ti a; Zoram mipuite Krismas leh kumthar lo thleng tur hlim taka hmang turin duhsakna chibai a bûk a ni.